Riciklimi i tekstilit në Europë – Mund të reduktohen 4 milion ton dioksid karboni dhe të merren 2 miliard euro fitim

Aktualisht në Europë prodhohen më shumë se 15 kilogramë mbetje tekstili në vit për person, për një total prej 7.5 milion ton. Pjesa më e madhe e tyre vjen nga veshjet dhe nga pëlhurat që hidhen nga konsumatorët e që përfaqësojnë rreth 85% të totalit. Vendgrumbullimet e mbeturinave si brenda dhe jashtë Europës janë destinacioni përfundimtar. Pjesa më e madhe e njerëzve po e kupton vetëm tani se një proces i tillë ka pasoja serioze për ambjentin. Në raportin e fundit të publikuar nga McKinsey, “Përshkallëzimi i riciklimit të tekstilit në Europë – të kthesh humbjen në para”, shpjegohet se në cfarë mënyre riciklimi i tekstilit mund të transformojë humbjen në vlerë si dhe të ndërtojë një sektor të ri prodhues, duke krijuar të ardhura dhe vende pune. Dhe për të realizuar një projekt të tillë, po sipas raportit, do të duheshin deri në 7 miliard euro.

Falë këtij investimi, pas vendosjes së teknologjisë së duhur, ajo e riciklimit të tekstilit do të bëhej një industri e pavarur dhe fitimprurëse deri në 2.2 miliard euro brenda 2030-ës.

Zinxhiri i vlerës së riciklimit të tekstilit mund të krijojë një lëndë të parë të re dhe të vlefshme që do të mundësonte më shumë prodhim veshjesh në Europë, gjë që mund të çonte në krijimin e vlerës shtesë përtej asaj që përcaktohet në këtë raport. Rritja e riciklimit të pëlhurave lejon marrjen e përfitimeve të ndryshme mjedisore dhe sociale. Për shembull, në skenarin bazë, rreth 15 mijë vende të reja pune mund të krijohen dhe emetimet e CO2 mund të reduktohen me rreth 4 milion ton, e barabartë me emetimet kumulative të një vendi me madhësinë e Islandës. Duke vlerësuar në terma monetarë, duke marrë parasysh faktorë të tillë si efektet dytësore në PBB që rrjedhin nga krijimi i vendeve të punës, ulja e emetimeve të dioksidit tw karbonit dhe reduktimi i ujit e përdorimi i tokës, analiza tregon se industria mund të arrijë në 3.5 deri në 4.5 miliardë euro për sa i përket ndikimit total vjetor deri në vitin 2030, me një kthim vjetor të investimit prej 55 deri në 70 për qind.

Problemi i mbetjeve të tekstilit në Europë pritet të zmadhohet: sipas raportit, vëllimet bruto të mbetjeve do të rriten në 8.5 – 9 milionë ton deri në vitin 2030, për shkak të rritjes së konsumit dhe rritjes së popullsisë. aktualisht, vetëm 10%  – 0.7 milionë ton –  të mbetjeve tekstile të prodhuara nga konsumatorët janë në dispozicion për riciklim. Kjo për shkak se vetëm një e treta e mbetjeve shtëpiake pas konsumit grumbullohet, ndërsa një pjesë më e madhe rishitet në tregjet vendase ose ndërkombëtare të veshjeve të përdorura.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.