“Riedukim” për tatimorët dhe doganierët! – Krijohet “akademia” e trajnimeve për të rritur nivelin e burimeve njerëzore

Infomaliteti i lartë në ekonomi,  perfomanca e luhatshme ndër vite në vjeljen e taksave dhe tatimeve, si dhe ndërrimi i shpeshtë i stafit në administratën tatimore dhe doganore, mesa duket ka sjellë nevojën e një “riedukimi” për punonjësit e këtyre institucioneve, që të jenë në nivelin e duhur.

Me një vendim të posaçëm qeverise, i cili është botuar në Fletoren Zyrtare, parashikohet krijimi, organizimin dhe funksionimi i  Qendrës së Trajnimit të Administratës Tatimore dhe Doganor, qendër e cila do të jetë në varësi të Ministrisë së Financave.

Sipas vendimit në fjalë, kjo “akademi”, do të ketë si mision të sigurojë që kapacitetet e burimeve njerëzore të administratës tatimore dhe doganore në fushën fiskale të jenë në nivele të larta, me qëllim rritjen e performancës së tyre në kryerjen e detyrave dhe rritjen e cilësisë së shërbimeve, që ofrojnë këto administrata ndaj tatimpaguesve.

Fushat e përgjegjësisë së Qendrës janë: forcimi i njohurive specifike të nëpunësve të  administratës tatimore dhe doganore në fushën  fiskale nëpërmjet trajnimeve; kërkimet studimore dhe analizat në fushën fiskale; botimi i studimeve në fushën fiskale; krijimi i njohurive specifike fiskale për nëpunësit e administratës shtetërore, që kanë lidhje me fushën fiskale, sipas kërkesës dhe kur është e mundur nga Qendra. Trajnimet për punonjësit dhe nëpunësit e  administratës tatimore dhe doganore jepen pa  pagesë dhe gjatë kohës së trajnimit nëpunësi merr  pagën e plotë.

Punonjësit e tjerë të administratës  shtetërore përfitojnë trajnimin pa pagesë, në rastet  kur ka kërkesë nga institucionet përkatëse. Përsëritësit e programeve të trajnimit do të  paguajnë 10 mijë lekë për program dhe në fund të programit punonjësit u nënshtrohen testit, dhe nëse e kalojnë, pajisen me certefikatën përkatëse. Kjo qendër financohet nga buxheti i shtetit.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.