“Ringrihet” trafiku ajror – Pas goditjes nga pandemia, numri i pasagjerëve afër nivele të para COVID-19

Raporti i trafikut ajror për muajin prill 2023 tregon se trafiku i pasagjerëve bëri hapa të metejshëm drejt një rekuperimi të plotë pas goditjes së marrë nga pandemia e COVID-19. Sipas dokumentit të publikuar nga Këshilli Ndërkombëtar i Aeroporteve, me qendër në Bruksel, trafiku i pasagjerëve në rrjetin evropian të aeroporteve u rrit me 21.1% në prill 2023, krahasuar me të njëjtin muaj të vitit të kaluar.

“Duke marrë parasysh se kufizimet e udhëtimit në Evropë ishin lehtësuar vitin që shkoi, një rritje e tillë është e ndjeshme”, – vlerëson raporti. Si rezultat, kur krahasohet me nivelet para pandemisë (prill 2019), vëllimet në prill të këtij viti qëndruan në -7.6%, një përmirësim i mëtejshëm krahasuar me muajt e mëparshëm.

Megjithatë, jo të gjithë aeroportet përfituan në të njëjtën masë. Ndryshimet në performancë mbetën të rëndësishme si në nivel kombëtar, ashtu edhe në atë individual, me vetëm 47% të aeroporteve të Evropës që rekuperuan plotësisht vëllimet e tyre të pasagjerëve para pandemisë.

Aeroporti i Tiranës duket se është aeroporti me rritjen më të madhe të trafikut të pasagjerëve në muajin prill 2023, krahasuar me të njëjtën periudhë të një viti më parë, duke qenë se ky aeroport ka raportuar një rritje me 115.8% të numrit të pasagjerëve. Rinasi bën pjesë në grupin 4 të aeroporteve, një klasifikim që bëhet sipas numrit të pasagjerëve që pret secili prej tyre.

Ola Mitre / Arkive

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.