Rivalët Truss dhe Sunak që synojnë “Douning Street” – Planet ekonomike të kandidatëve për kryeministër konsiderohen si jo reale

Liderët e politikës në Britaninë e Madhe janë akuzuar se po prezantojnë zgjidhje për problemet e vendit, të cilat i përkasin fantazisë, në një moment që britanikët po përketojnë krizën më të rëndë të kostos së jetesës në dekada. Në të njëjtën kohë qeveria akuzohet se nuk po vepron sa duhet pasi është hutuar nga gara për lidershipin e partisë konservatore që do të vendosë se kush do të pasojë Boris Johnson në postin e kryeministrit të vendit.

Zyra e kryeministrit në largim Johnson, bëri të ditur se ai ka nisur një javë pushime, ndërkohë që sipas Douning Street tashmë i takon kryeministrit të ardhshëm që të marrë masat e duhura.

Liz Truss and Rishi Sunak, dy kandidatët për të zëvendësuar Johnson janë përqendruar për të marrë sa më shumë vota, në një kohë që ekonomia po përballet me një recesion të gjatë dhe Britania e Madhe regjistron inflacionin më të lartë në grupin e G7-ës, që ka thyer një rekord 40 vjecar. Në korrik inflacioni arriti nivelin e 9.4% dhe Banka e Anglisë pret që të rritet dhe më shumë në muajin tetor kur pritet që të shtrenjtohen dhe më shumë faturat e energjisë elektrike.

Analistët ekonomikë në vend janë shprehur të zhgënjyer me planet ekonomike të shpalosura si nga kandidatët konservatorë po ashtu dhe nga ai i opozitës laburiste. Truss, sekretare e jashtme, ka thënë se ajo preferon uljen e taksave dhe nuk është angazhuar për të rritur pagat direkte për konsumatorët. Sunak, ish ministër i financave, mbështet “ndihmën urgjente” për t’u mundësuar njerëzve të paguajnë faturat, por pa dhënë detaje.

Në fillim të këtij viti ai miratoi një ndihmë financiare prej 400 paund – 475 euro  për të kompensuar faturat e karburantit që të gjitha familjet do të marrin këtë vjeshtë. Ai kundërshton uljet e menjëhershme të taksave, por është zotuar të ulë normën bazë të tatimit mbi të ardhurat me 20% deri në vitin 2029.

Megjithatë, analistët pranojnë se laburistët kanë shkuar shumë më tej se pretendentët e udhëheqjes konservatore në dhënien e detajeve se si të paguajnë për planet e tyre. Starmer, lideri i opozitës laburiste tha se partia e tij, nëse është në pushtet, do të zgjasë në kohë një taksë të papritur mbi kompanitë e naftës dhe gazit në Detin e Veriut për të mbledhur 8.1 miliardë paund – 9.6 miliard euro. Analistët kanë parashikuar që një faturë tipike vjetore e energjisë shtëpiake mund të arrijë ekuivalentin e 5 mijë eurove  në janar.

Ndërkohë, ish-kryeministri laburist i Britanisë së Madhe, Gordon Broun, i cili ishte në pushtet gjatë krizës financiare globale të vitit 2008, bëri thirrje që Boris Johnson, Truss dhe Sunak të mblidhen dhe të hartojnë një buxhet emergjent në përgatitje për një “bombë financiare me sahat ” në tetor. Fituesi i garës për lidershipin konservator – i cili do të bëhet edhe kryeministri i ardhshëm i vendit – do të shpallet më 5 shtator.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.