Rritet buxheti për PPP-të e rrugëve – Investimet në 2023-in/ Ja akset prioritare, që planifikohen të financohen

Kontratat koncesionare për ndërtimin e rrugëve do të marrin më shumë para’ nga buxheti I shtetit gjatë vitit që vjen. Sipas pr.buxhetit të vitit 2023, të depozituar në Kuvend në total parashikohet që për këto kontrata të paguhet 4.59 mld lekë, nga 4.17 mld lekë që ishte buxheti i këtij viti. Pjesa dërrmuese e fondeve do të shkojë për koncesionin e rrugës së Arbrit, me 2.88 mld lekë lekë, ndërsa 2 kontratat e tjera që do të financohen janë ato për ndërtimin e autostradës Milot – Morinë dhe aksi Orikum – Dukat.

Ndërkaq, buxheti për ndërtim dhe sistemim rrugësh parashikohet në rreth 12 mld lekë, nga 10.1 mld lekë që ishte për vitin 2022. Gjysma e këtyre fondeve parashikohet të shkojnë për ndërtimin e tunelit të Llogarasë, me 6.25 mld lekë, ndërsa 1.88 mld lekë është parashikuar të jetë financimi për Unazën e re të Tiranës. Për lotet 4, 5, 6 dhe 7 të kësaj vepre janë parashikuar nga 239 mln lekë, ndërsa për lotin 2, 170  mln lekë, duke u bërë akset më shumë të financuar të kësaj vepre.

Për aksin Kardhiq – Delvinë ka një ulje të ndjeshme të financimit të parashikuar, me 149 mln lekë, duke parashikuar që pjesa tjetër e mbetur e financimit të kryhet në vitet në vijim. Ndërkaq, një tjetër aks që duket se ka marrë përparësi financimi për vitin 2023 është Elbasan – Qafë Thanë, për të cilin është parashikuar një fond prej 620 mln lekësh.  Po ashtu, ajo që bie në sy është financimi i konsiderueshëm që është akorduar për 2 projekte të tjerë, që është rehabilitimi i rrugës së vjetër Fier – Vlorë, me 1.08 mld lekë dhe sistemimi dhe rivitalizimi I akarpateve në Shkallën e Tujanit, me 1.12 mld lekë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.