Rritet financimi për koncesionet e rrugëve – Projektbuxheti 2024/Për herë të parë financohet bypassi i Tiranës

Teksa financimi i përgjithshëm për transportin rrugor parashikohet në rënie, buxheti për kontratat koncesionare për ndërtimin e rrugëve do të pësojë rritje gjatë vitit 2024. Sipas draftit të dërguar në kuvend janë 3 kontrata që do të mbështeten, me një vlerë totale prej rreth 5.2 mld lekë, nga rreth 4.4 mld lekë që u shpërndanë gjatë këtij viti.

Paratë do të shkojnë për koncesionin e rrugës së Arbrit, autostradën Milot – Morinë dhe ndërtimin e rrugës Orikum – Dukat. Buxheti për kontratat koncesionare përbën gati 30% të të gjithë fondit total që shkon për transportin rrugor.

Për vitin 2024, buxheti për transportin rrugor do të jetë 17.6 mld lekë apo 1 mld lekë më pak se viti 2023. Projektet prioritare që do të mbështeten vitin e ardhshëm janë kryesisht ato të nisura tashmë, sikurse është Tuneli i Llogarasë, Unaza e Madhe e Tiranës apo zgjerimi i rrugës Elbasan – Qafë Thanë, që është pjesë e korridorit VIII.

Sa i takon këtij të fundit një pjesë e financimit do të shkojë edhe për projektimin e disa prej segmenteve, që janë tenderuar apo janë në fazë tenderimi gjatë këtij viti.

Ndërkaq, sa i takon investimeve rrugore me financim të huaj, janë rreth 2.3 mld lekë që do të shkojnë për transportin rrugor. Pjesa më e madhe e këtyre fondeve do të shkojë për ndërtimin e segmentit rrugor Qukës – Qafë Plloçë.

Ndërkohë që, gjatë vitit 2024 do të financohet edhe ndërtimi i bypass-i i Tiranës, me një vlerë prej 51 mln lekë. Ky segment është pjesë e autostradës Milot – Fier dhe ka një gjatë prej 7 km.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.