Rritet ndjesia ekonomike, shkak kryesor ndërtimi – BSH: Besimi i konsumatorëve përsëri në rënie të lehtë, por mbi mesataren historike

Treguesi i ndjesisë ekonomike ka shënuar një përmirësim të ndjeshëm për muajin gusht. Sipas vrojtimit periodik të sapopublikuar nga Banka e Shqipësë, ky tregues shënoi nivelin 114.1 në muajin gusht, me rritje prej 2.1 pikësh në krahasim me muajin korrik, duke qëndruar 14.1 pikë mbi mesataren afatgjatë. Banka e Shqipërisë shpjegon se rritja u përcaktua nga rritja e besimit në sektorët e shërbimeve dhe ndërtimit. Ndërkohë, besimi në bizneset e tregtisë dhe të industrisë, si dhe besimi konsumator regjistruan rënie.

Në themel të përmirësimit të ndjesisë ekonomike qëndron sektori i ndërtimit. Treguesi i besimit në ndërtim u rrit me 5.1 pikë përqindje në muajin gusht. Ky tregues qëndron rreth 30 pikë përqindje mbi mesataren afatgjatë. Rritja këtë muaj u përcaktua si nga vlerësimet më të mira për aktivitetin aktual ndërtues, ashtu dhe për nivelin e porosive aktuale. Pritjet për punësimin janë në rritje, ndërkohë që ato për çmimet në të ardhmen janë në rënie.

Treguesi i besimit në shërbimeu rrit ndjeshëm me 8.6 pikë përqindje në muajin gusht. Niveli i qëndron në intervalin e vlerave më të larta historike, rreth 24.4 pikë përqindje mbi mesataren afatgjatë. Të dy komponentët përbërës të treguesit, ecuria aktuale e aktivitetit dhe niveli i kërkesës, kanë regjistruar rritje të fortë. Pritjet e bizneseve për çmimet në të ardhmen janë në rritje.

Ndërkaq, treguesi i besimit në tregti u tkurr me 2.8 pikë përqindje në muajin gusht, i ndikuar kryesisht nga vlerësime jo optimiste mbi ecurinë aktuale të biznesit. Në të kundërt, bizneset e sektorit presin një rritje të porosive dhe të ecurisë së biznesit në të ardhmen e afërt. Niveli aktual qëndron rreth 12.5 pikë përqindje mbi mesataren historike. Pritjet për punësimin dhe çmimet në të ardhmen janë vlerësuar në rënie.

Por një prej treguesve më të rëndësishëm, ai i besimit konsumator vijoi të bjerë lehtësisht edhe në muajin gusht, me 0.5 pikë përqindje. Megjithë rënien e dy muajve të fundit, niveli aktual i treguesit mbetet 1.6 pikë përqindje mbi mesataren historike. Treguesi këtë muaj, u përcaktua nga pritjet më pak optimiste për situatën financiare dhe blerjet në shuma të mëdha për të ardhmen. Pritjet për nivelin e përgjithshëm të çmimeve dhe punësimin në të ardhmen janë rishikuar për lart.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.