Rritja e bonove të thesarit, tkurr fondet e investimeve – AMF: Pakësohet numri i investitorëve dhe vlera totale e aseteve të tregut

Normat shumë të larta që po ofrojnë bonot e thesarit e obligacionet, si në tregun primar, ashtu edhe në atë sekondar, kanë ndikuar negativisht tregune e fondeve të investimeve. Gjatë periudhës janar shtator, ky treg ka shënuar tkurrje sa i përket volumit të investimeve, ashtu dhe numrit të investitorëve.

Autoriteti i Mbikqyrjes Financiare ka publikuar ecurinë e këtij tregu për vitin 2022.  Sipas analizës së të dhënave për tregun e fondeve të investimeve në 30.09.2022, vlera neto e aseteve të Fondeve, arriti rreth 53.76 miliardë lekë, rreth 530 milionë dollarë, me një ulje prej 23,9 miliardë lekë ose 30.8%, krahasuar me 31.12.2021. Numri i anëtarëve që kanë investuar në Fondet e Investimit më 30.09.2022 është 34,231 me një zbritje prej 14.54% krahasuar me 31.12.2021.

Ky treg dominohet kryesisht nga investimet në Obligacione Qeveritare, të cilat përbëjnë 58.77% të aseteve të fondeve, me një zbritje prej 5.48% krahasuar me 31.12.2021.

Ajo që ka ndodhur, është se pasë rritjes së fortë që kanë shënuar normat e interesave të bonove e obligacioneve të qeverisë që prej kësaj vere, investirorët kanë preferuar t’i tërheqin paratë prej fondeve të investimit, e t’i investojnë në letra me vlerë.

Rënia e këtij tregu, pritet të vijojë edhe për një periudhë relativisht të shkurtër, koha e duhur, që normat e interesit me të cilat ai operon, të nisin të reflektojnë rritjen e normës bazë të Bankës së Shqipërisë. Pritshmëritë janë që më tej, tregu i fondeve të investimit, t’u afrohet normave të larta të fitimeve që ofron veccanërisht tregu primar i bonove dhe obligacioneve.

Aktualisht në vend, në tregun e fondeve të investimeve ushtrojnë aktivitetin e tyre njëmbëdhjetë subjekte.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.