Rritja e çmimit të energjisë për HEC-et – Shoqata kërkon aplikimin që nga janari, “rrëzohet” nga ERE

Enti Rregullator i Energjisë rrëzoi kërkesën e Shoqatës Shqiptare e Energjive të Rinovueshme, mbi kohën e aplikimit të rritjes së çmimit me të cilin qeveria blen energjinë nga prodhuesit me përparësi të energjisë elektrike.

Kërkesa erdhi pas vendimit të ERE-s, që parashikon se çmimi i rritur prej 10 lekë/kWh, nga 8.5 lekë/kWh që ishte përcaktuar më herët për vitin 2023, të aplikohej nga muaji shkurt, teksa shoqata kërkon që rritja të nisë që nga muaji janar. Ndryshimi në çmim erdhi pas një vendimi qeverie, që rriti nivelin maksimal të çmimit të llogaritur të blerjes së energjisë elektrike e që në atë kohë u argumentua me detyrimin e këtyre prodhuesve për të mos e eksportuar energjinë e prodhuar.

Çmimi vjetor i energjisë për hidrocentralet deri në 15 MW përcaktohet përmes një metodologjie që merr në konsideratë çmimin mesatar në bursën hungareze, bonusin për promovimin e burimeve të rinovueshme, në masën 1.2 dhe normën mesatare të këmbimit në euro/lekë për vitin e fundit. Gjithsesi, metodologjia përcakton një çmim makismal, që aktualisht është rritur me 1.5 lekë/kWh, duke e çuar në 10 lekë/kWh.

Normalisht, rritja e çmimit me të cilin qeveria e blen energjinë nga hidrocentralet e vegjël pasohet me efekte financiare në buxhetin e shtetin e shtetit, ndonëse këta të fundit përpara krizës energjetike argumentonin se energjia e importit kushtonte më shtrenjtë.

Ola Mitre/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.