Rrugët e jugut do të ndriçohen me energji diellore – Korçë, Gjirokastër e Sarandë. ARRSH: Do të ulet numri i aksidenteve

Rrugët kryesore të jugut në vendin tonë pritet të ndriçohen nga energjia diellore nëpërmjet paneleve foto-voltaike duke mos u varur më nga rrjeti me energji elektrike. Nga degëzimi Jorgucatit në aksin Gjirokastër- Sarandë, degëzimi Plasës në pikën ku kryqëzohen akset Korçë-Kapshticë dhe Libonik- Plasë  duke përfshirë degëzimin e rrugës Zemblak- Dogana Goricë në segmentin Korçë-Kapshticë dhe segmentin rrugor Gjirokastër- Kakavijë.

Për ndricimin e rrugëve por jo vetëm, Autoriteti Rrugor Shqiptar ka hapur tenderin me vlerë 166.5 milionë lekë për rajonin e jugut. Ky vendim sipas ARRSH merret për shmangjen e mirëmbajtjes së kushtueshme si dhe problemet e furnizimit me energji elektrike apo të dëmtimeve të mundshme. Zona e ndriçuar duhet të ketë një hapësirë prej një distance 100m përpara dhe pas kryqëzimit, si dhe është e nevojshme që të ndriçohet dhe një pjesë e zonës së rrugës dytësore.

Përtej ndriçimit të akseve të përmendura, do të përfshihen punime në sinjalistikë si dhe plotësim/shtim të atyre elementeve të cilët janë dëmtuar, ose nuk kanë qenë të përfshirë në projekte të mëparshme.

Kjo procedurë sipas Autoritetit Rrugor Shqiptar do të realizohet shpejtë për të qenë gati për sezonin turistik. Rreth 27,6 % e aksidenteve gjatë vitit 2022 në rrugët shqiptare kanë ndodhur në kushtet e errësirës, të cilat kanë qenë edhe më të rënda referuar vdekjeve dhe plagosjeve. ARRSH parashikon një reduktim të numrit të aksidenteve gjatë natës 13% deri në 75 % sipas llojit të rrugës.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.