Rusia me një vendim të ri – Bitcoin dhe kriptovalutat e tjera pritet të bëhen legale sipas ministrit të vendit
Rusia herët a vonë do të legalizojë kriptovalutat si një mjet pagese, tha Ministri i Industrisë dhe Tregtisë Denis Manturov, duke sugjeruar se qeveria dhe banka qendrore mund të jenë më pranë zgjidhjes së mosmarrëveshjeve të tyre.
Pak përpara se Rusia të dërgonte dhjetëra mijëra trupa në Ukrainë më 24 shkurt, ministria e financave paraqiti propozime legjislative që bien ndesh me kërkesën e bankës qendrore për një ndalim të plotë.
Manturov u pyet në një forum nëse ai besonte se kriptovalutat do të bëheshin të ligjshme si një mjet pagese.
“Pyetja është se kur të ndodhë kjo, si do të rregullohet, tani që banka qendrore dhe qeveria po punojnë në mënyrë aktive për të”, u përgjigj ai.
“Por të gjithë priren të kuptojnë se herët a vonë kjo do të zbatohet, në një format apo tjetër”.
Rusia ka plane të emetojë rublën e saj dixhitale, por qeveria vetëm kohët e fundit ka arritur të mbështesë përdorimin e kriptomonedhave private, duke argumentuar për vite me radhë se ato mund të përdoren për pastrim parash ose për financimin e terrorizmit.
Megjithatë, Guvernatorja e Bankës Qendrore, Elvira Nabiullina ka thënë se banka nuk mund të mirëpresë investimet në kriptomonedha, të cilat përbëjnë rreth 5 miliardë dollarë (4.76 miliardë euro) transaksione në vit nga rusët, dhe ka propozuar ndalimin e tregtimit dhe nxjerrjes së tyre.
Duke përmendur rreziqet për stabilitetin financiar nga rritja e numrit të transaksioneve kripto, zyrtarë të tjerë të bankës qendrore thanë vitin e kaluar se nuk shihnin hapësirë që kriptomonedha të përdoret në tregun financiar rus.
Manturov tha se rregulloret për përdorimin e kriptomonedhave në radhë të parë do të formulohen nga banka qendrore dhe më pas nga qeveria.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.