Sa e mbrojtur është Shqipëria në rast krize ushqimore? – Civici: Kemi marrë masa. Prioritet shitja e prodhimit vendas të grurit
Vitin e kaluar vendi ynë është përballur me një situatë të pazakontë për shkak të luftës Rusi-Ukrainë, e cila u pasua edhe me mbyllje të eksporteve të drithërave nga disa vende të rajonit, situatë që gjeti zgjidhje përmes një marrëveshje trepalëshe midis Shqipërisë Serbisë dhe Maqedonisë së Veriut.
Por sa e mbrojtur është Shqipëria në rast të një krize tjetër apo goditjeve në tregjet ndërkombëtare? Në një intervistë për SCAN TV, Zv. Ministri i Bujqësisë Enio Civici thekson se përmes kësaj marrëveshje janë marrë masa që të mos ketë ndërprerje furnizimi në asnjë moment.
Nga ana tjetër, Ministria e Bujqësisë përmes Skemës Kombëtare të subvencioneve, ndërmori një fushatë për mbështetjen e kultivimit të grurit dhe tashmë po kujdeset që produkti vendas të blihet nga kompanitë prodhuese, duke i dhënë prioritet në raport me importin.
Zv.Ministri i Bujqësisë thekson gjithashtu se po vijohet me procesin e verifikimit në terren të aplikime për subvencione në bujqësi, e ndërsa shpërndarja e naftës falas po vijon normalisht, së shpejti do të nisë disbursimi për masat e tjera.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.