Sa hapësirë zënë mallrat kineze dhe turke në treg? – Shtetet e preferuara të Shqipërisë për disa kategori produktesh

Kina dhe Turqia ofrojnë furnizime me çmime shumë më të favorshme të mallrave për importuesit dhe konsumatorët shqiptarë se sa tregjet e tjera, duke i bërë këto dy shtete ndër të preferuarat për tregtinë e jashtme. Të dhënat e INSTAT sa i takon tregtisë së jashtme, vënë në dukje se Kina zë shtetin e dytë sa i takon vlerës së mallrave të importuara, pas Italisë, dhe Turqia zë vendin e tretë.

Konkretisht nga Kina kemi importuar 78.1 miliardë lekë mallra në 10 mujor, me një rritje prej 16.1 miliardë lekë krahasuar me periudhën Janar-Tetor 2022.

Nga ky shtet importojmë më së shumti makineri, pajisje dhe pjesë këmbimi; tekstile dhe këpucë; Materiale ndërtimi dhe metale si dhe produkte kimike dhe plastike.

Ndërsa nga Turqia blejmë 70.5 miliardë lekë mallra, edhe pse me një rënie të ndjeshme krahasuar me një vit më parë, prej 24.3 miliardë lekë, por pavarësisht kësaj, sërish nuk ka rënë nga “piedestali” i renditjes krahasuar me vendet e tjera partnere. Grupmallrat më të kërkuara nga Turqia janë materiale ndërtimi dhe metale; tekstile dhe këpucë.

Sa i takon eksporteve drejt këtyre shteteve, ato janë modeste.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.