Sa peshë zë akuakultura në vend? Përcaktohen zonat e reja ku do të jepen leje për kultivimin e peshkut

Akuakultura në Shqipëri, përfaqëson një sektor të rëndësishëm dhe zotëron një potencial të madh për komunitetet bregdetare.  Vitet e fundit, ky aktivitet ka njohur zhvillim të konsiderueshëm. Referuar të dhënave zyrtare nga Organizata Kombëtare e Ushqimit, prodhimi i përgjithshëm nga uji i ëmbël, uji i njelmët dhe mjedisi detar, është rritur në mënyrë të qëndrueshme gjatë viteve të fundit, mesatarisht në 6,258 ton dhe ka një vlerë rreth 22 milionë USD.

Por duket se qeveria shqiptare do ti kushtojë më shumë rëndësi për zhvillimit të mëtejshëm të këtij sektori përmes udhëzuesit të politikave për planifikimin e Zonave të Përcaktuara për Akuakulturë (ZPA) në Shqipëri në përputhje me ligjin e miratuar në vitin 2016 “Për Akuakulturën” i cili synon të sigurojë një zhvillim më të qëndrueshëm të sektorit.

Sipas dokumentit të hedhur për konsultim, krijimi i ZPA-ve do të siguronte një integrim më të mirë të akuakulturës në zonat bregdetare dhe është një parakusht për dhënien e licencave dhe qirave të reja për akuakulturë. Kështu, në dokument përcaktohen 18 zona për zhvillimin e këtij aktiviteti sa i takon kultivimit të peshkut dhe molusqeve  në Shëngjin, Durrës, Vlorë dhe Sarandë.

Lidhur me kultivimit të peshkut, janë identifikuar në total 11 ZPA me një shtrirje totale prej 117.8 mijë km² dhe një prodhim potencial total vjetor të vlerësuar në 63,649 ton peshk, bazuar në kapacitetin mbajtës. Për kategorinë e molusqeve, janë identifikuar gjithsej 7 zona me një shtrirje totale prej 108.7 mijë km^2.

Aktualisht, sektori i akuakulturës në Shqipëri gjeneron rreth 600 vende pune të drejtpërdrejta, duke përfshirë punën me kohë të plotë dhe të pjesshme, si dhe të gjitha punësimet indirekte në aktivitetet ndihmëse ekonomike përgjatë zinxhirit të vlerë, si përpunimi, shpërndarja, shitja me pakicë, paketimi, pajisjet, industria e ushqimit, shërbimi ushqimor, turizmi, etj. Sipas draftit, një zgjerim i sektorit të akuakulturës do të gjeneronte punësim të mëtejshëm direkt dhe indirekt në të gjithë zinxhirin e vlerës.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.