Senati italian miraton marrëveshjen Rama – Meloni për emigrantët Votat pro ishin 92, kundër 61 dhe asnjë abstenim
Është miratuar në mënyrë përfundimtare marrëveshja mes Italisë dhe Shqipërisë për pritjen e emigrantëve në territorin e vendit tonë. Dhoma e Senatit votoi pro projektligjit që ratifikon marrëveshjen mes kryeministrave Rama dhe Meloni.
Teksti parashikon hapjen e dy qendrave pritjeje për riatdhesimet në territorin shqiptar, për të pritur 3 mijë emigrantë. Marrëveshja mblodhi 93 vota pro, 61 kundër dhe asnjë abstenim. Duartrokitje pasuan nga rradhët e mazhorancës.
Marrëveshja me Italinë për emigrantët ‘nuk bie ndesh me qëndrimin e BE-së për imigracionin. Përkundrazi, ajo që ne bëjmë me Italinë është ajo që duhet të bëjë një shtet anëtar’, u shpreh kryeministri shqiptar Edi Rama mëngjesin e sotëm në Bruksel. Ai shtoi se dështimi i të ashtuquajturës rishpërndarje nuk e dëmton atë që po bën Shqipëria.
Marrëveshja parashikon që emigrantët që nisen për në Itali, të hyjnë në Shqipëri përmes portit të Shëngjinit dhe të trajtohen në një kamp në Gjadër të Lezhës.
Kostot financiare do t’i përballojë Italia, dhe emigrantët do të rrinë aty vetëm sa të përfundojë shqyrtimi i kërkesave të tyre për azil.
Në rast refuzimi, sipas marrëveshjes, Italia i largon ata nga Shqipëria.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.