Shkeljet në ankandet publike – APP gjobit 8 punonjës dhe propozon masa disiplinore për 22 të tjerë

Agjencia e Prokurimit Publik ka gjobitur 8 punonjës dhe ka propozuar marrjen e masës disiplinore për 22 të tjerë, për shkak të veprimeve në kundërshtim me legjislacionin e ankandit publik. Vendimet e APP bazohen në verifikimet e kryera gjatë periudhës shtator 2022 – mars 2023 në disa procedura ankandi publik, të zhvilluara nga autoritete të ndryshme shitëse, në vitin 2021.

Sipas APP, në disa procedura ankandi të verifikuara, nuk është pasqyruar në mënyrë të qartë sesi është bërë llogaritja e vlerës fillestare apo sesi është aplikuar ulja përkatëse, në rastin e procedurave të rishpallura. Po ashtu, ka rezultuar se në disa raste autoritetet shitëse nuk kanë përcaktuar në mënyrë të qartë dhe të plotë infomacionin specifik, një prej të cilëve është grafiku i zbatimit të kontratës, si një informacion i rëndësishëm që u shërben operatorëve në përgatitjen e ofertave të tyre.

Nga procesi i verifikimit rezultoi gjithashtu se në disa raste autoritetet shitëse nuk kanë zhvilluar proceduart ligjore lidhur me përcaktimin e vlerës së hapit të dhënies së ofertave, por e kanë shpallur fituesin e procedurës bazuar në ofertën fillestare të paraqitur prej tij. Nisur nga shkeljet e konstatura, APP iu ka dërguar një shkresë të gjithë autoriteteve shitëse dhe operatorëve ekonomikë, duke dhënë një sërë rekomandimesh, që duhet të mbahen parasysh gjatë zhvillimit të këtyre procedurave.

Ndër të tjera, APP thekson se autoritetet shitëse duhet të mbajnë në vëmendje deklarimin mbi gjendjen e konfiklit të interesit nga nëpunësit e përfshirë në procesin e ankandit. Po ashtu, në njoftim duhet të jepet informacioni i nevojshëm për t’i lejuar ofertuesve të vendosin nëse do të marrin pjesë ose jo në procedurë, si dhe për të nxitur konkurrencën dhe pjesëmarrjen e blerësve.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.