Shkencëtarët krijojnë xhelin që rikrijon indet e zemrës dhe trajton sëmundjet kardiovaskulare!

Studiuesit kanë qenë të suksesshëm në krijimin e indeve të zemrës në një xhel të biodegradueshëm që mund të përdoret në trajtimin e sëmundjeve kardiovaskulare. Studimi u prezantua në konferencën e Shoqërisë Kardiovaskulare Britanike në Mançester.

Me botën që po përballet me më shumë sëmundje të lidhura me zemrën, studiuesit në Mbretërinë e Bashkuar kanë zhvilluar një xhel të ri që mund të ndihmojë në riparimin e dëmit të shkaktuar nga një atak në zemër. Studiuesit ishin në gjendje të mbështesin rritjen e muskujve të zemrës me xhel.

Shkencëtarët kanë kohë që kërkojnë mënyra për të reduktuar rrezikun e përparimit të dështimit të zemrës. Megjithatë, vetëm 1 % e qelizave të injektuara direkt në zemër mbetën në vend dhe mbijetuan. Hulumtimet e fundit kanë ndihmuar në zhvillimin e një xheli të ri që mund të injektohet në mënyrë të sigurt direkt në zemër për të formuar një skelë për rritjen e indeve të reja.

Xheli përbëhet nga zinxhirë aminoacide të quajtura peptide, blloqet ndërtuese të proteinave. Lidhjet midis peptideve nënkuptojnë se xheli mund të ekzistojë në gjendje të ndryshme. Kur janë nën stres, peptidet shpërbëhen dhe sillen si një lëng, duke e bërë atë ideal për injeksione.

Një ekip studiuesish nga Universiteti i Mançesterit shpresojnë se xheli i tyre do të jetë një pjesë kyçe e trajtimeve rigjeneruese të ardhshme për zemrat e dëmtuara.

Studiuesit argumentojnë se një furnizim i mirë me gjak do të jetë jetik për zhvillimin e qelizave të injektuara në inde të reja dhe ata kanë vërejtur shenja të rritjes së enëve të gjakut në xhel, duke dëshmuar se teknologjia mund të stimulojë rritjen e enëve të reja.

Ekipi ishte gjithashtu në gjendje të tregonte se xheli mund të mbështesë rritjen e indeve normale të muskujve të zemrës. Shkencëtarët ishin në gjendje të rritnin inde të reja kur shtuan qeliza njerëzore në xhelin që ishte riprogramuar për t’u bërë qeliza të muskujve të zemrës. Pasi u rritën për tre javë, qelizat filluan të funksionojnë normalisht. Fondacioni Britanik i Zemrës, i cili financoi projektin, tha se ekipi injektoi xhelin e etiketuar me fluoreshente në zemrat e minjve të shëndetshëm, gjë që tregoi se xheli mbeti në zemër për dy javë.

Ekokardiogramet (ultratingujt e zemrës) dhe elektrokardiogramet (EKG-të, të cilat matin aktivitetin elektrik të zemrës) kanë treguar se kjo metodë është e sigurt. Studiuesit tani planifikojnë të testojnë xhelin tek minjtë pas një ataku në zemër për të parë nëse qelizat e zemrës mund të krijojnë inde të reja muskulore.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.