Shkëputja nga nafta ruse – Hungarisë do t’i duheshin 4 vjet për të kompletuar procesin

Hungarisë i duhet deri në 4 vjet për t’u shkëputur nga nafta ruse si dhe i duhet të bëjë investime shumë të mëdha për të përmrësuar ekonominë, dhe deri në momentin që nuk do të ketë një marrëveshje për këto çështje, vendi nuk mund të mbështesë propozimin e Bashkimit Europian për një embargo të plotë.

Kreu i stafit të kryeministrit hungarez Viktor Orban, Gulias, tha për agjencinë e lajmeve Reuters, se nuk ishte periudha e tranzicionit problemi më i madh që po pengon arritjen e një marrëveshjeje.

Komisioni europian propozoi këto muaj sanksione të reja kundër Rusisë për shkak të pushtimit të Ukrainës, por duhet mbështetja unanime e të 27 vendeve anëtare, përfshirë Hungarinë e cila është shumë e varur nga nafta ruse.

Hungaria pretendon se i duhen rreth 750 milion euro për investime afatshkurtra për të përditësuar rafineritë dhe për të zgjatur tubacionet për të sjellë naftë nga Kroacia. Gjithashtu thotë se konvertimi afatgjatë i ekonomisë së saj larg naftës ruse do të kushtojë 17 miliard euro. Dhe Budapesti thekson se ka nevojë për këto fonde në mënyrë që të bëjë këtë lëvizje. Nëse komisioni europian mund ta japë një zgjidhje të tillë, atëherë vendi është gati të mbështesë sanksionet, nëse jo atëherë qëndrimi nuk do të ndryshojë.

Bashkimi Europian shpreson ende që të gjendet një marrëveshje për embargon ndaj naftës ruse para mbledhjes së Këshillit Europian javën e ardhshme. Por kryeministri hungarez Orban paralajmëroi BE-në që të mos përpiqej të gjente një marrëveshje kur liderët e BE-së të takohen, pasi nuk ka unanimitet. Budapesti ka bërë të qartë se nëse jepen fondet e kërkuara nga Hungaria, negociatat do të përfundonin brenda një ore.

Komisioni europian ende nuk ka miratuar ndihmën monetare në ndihmë të ekonomisë për shkak të pandemisë së Covid 19, për Poloninë dhe Hungarinë, për shkak  të cenimit të shtetit ligjor në këto dy vende.

Gulias tha se Hungaria ka ofruar një përgjigje konstruktive për çdo pyetje që ka bërë Brukseli.

Ai tha se nga ana e Komisionit nuk është një çështje profesionale, por ka të bëjë me  mungesën ose ekzistencën e vullnetit politik,  që të nënshkruajnë marrëveshjen me Hungarinë në lidhje me Fondin e Rimëkëmbjes.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.