Rritja e çmimeve, sa 5,5% e PBB të Kosovës – FMN paralajmëron fuqishëm kundër tërheqjeve shtesë nga fondi privat i pensioneve

Një mision i Fondit Monetar Ndërkombëtar (FMN), i kryesuar nga Gabriel Di Bella, zhvilloi një vizitë në Kosovë nga 10 deri 20 maj, për të diskutuar zhvillimet e fundit ekonomike, perspektivën dhe politikat. Në fund të kësaj vizite, kreu I misionit, Di Bella, vlerësoi disa nga masat e ndërmarra nga qeveria e Kosovës, por dha edhe disa këshilla.

Gabriel Di Bella, Kreu i misionit të FMN tha se “Lufta në Ukrainë është një tronditje e rëndë për Kosovën. Ndikimi i rritjes së çmimeve botërore të ushqimeve dhe energjisë në Kosovë mund të jetë deri në 5.5% të Prodhimit të Brendshëm Bruto. Ndërsa momenti nga rimëkëmbja e vitit të kaluar është ende i fortë, tronditja do të ndikojë në mënyrë të pashmangshme kërkesën dhe aktivitetin ekonomik në vitin 2022. Ruajtja e politikave të shëndosha makroekonomike dhe stabiliteti financiar, si dhe avancimi i zbatimit të reformave do të jenë thelbësore për tërheqjen e investimeve të huaja direkte në Kosovë. “

FMN parashikon se inflacioni më i lartë, si pasojë e rritjes së çmimeve të importit pritet të arrijë në më shumë se 10% në vitin 2022 dhe kërkon mbështetje të përkohshme për të ndihmuar familjet e cenueshme. Misioni vlerësoi autoritetet në për përgjigjen me shpejtësi me subvencione për inputet bujqësore, bonuse pagash dhe rritje të përkohshme të përfitimeve të pensioneve dhe transfertave sociale.

Gjithashtu, lëvizjet e duhura të politikave ishin edhe rritja e tarifave të energjisë elektrike në shkurt për të reflektuar faturën më të madhe të importit të energjisë elektrike së bashku me zbatimin e subvencioneve për rreth 20 për qind të familjeve. Një ndryshim i rritjes së tarifave do të çonte në një deficit më të madh të llogarisë korente dhe do të përbënte një barrë serioze për buxhetin.

Po ashtu, misioni i FMN u pajtua me propozimin për rritjen e pagës minimale me rreth 50 për qind, si dhe ranë dakord me autoritetet për nevojën e shkëputjes së rritjes së transfertave buxhetore nga paga minimale. Por, Fondi bëri edhe një paralajmërim të fortë për qeverinë e Kosovës.

Di Bella u shpreh se “Misioni i FMN-së paralajmëroi fuqishëm kundër tërheqjeve shtesë nga fondi privat i pensioneve, pasi këto do të përfaqësonin një goditje të rëndë për qëndrueshmërinë e sistemit të pensioneve dhe do të reduktonin fuqimisht vlerën reale të pensioneve të ardhshme. Tërheqjet do të përktheheshin gjithashtu në një tkurrje të madhe të tregjeve vendase të kapitalit, duke kompromentuar seriozisht financimin buxhetor dhe qëndrueshmërinë e borxhit.”

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.