Shqipëria ndryshon hartën sizmike! Ndryshojnë edhe standardet e ndërtimit- Sizmologu Edmond Dushi tregon në ‘SCAN Live’ se cilat janë zonat me të rrezikuara

Shqipëria do të ketë pas pak javësh hartën e re sizmike. Kjo u bë e ditur në SCAN Live nga sizmiologu Edmond Dushi ndërsa foli për nismën e re për sigurimin e detyrueshëm nga tërmetet. Dushi tha se harta e re e aktivitetit sizmik do të publikohet sëbashku me raportin përkatës këtë fundvit.

“Instituti i Gjeoshkencave ka pasur një seri bashkëpunimesh dhe e fundit që pritet të mbarojë këtë fundvit është një projekt që ne kemi gati 1 vit që punojmë me Global Earthquake Model dhe ky bashkëpunim po finalizon një hartë më të fundit i cili është edhe një studim gjithëpërfshirës i rrezikut sizmik në territorin e Shqipërisë, e cila do të jetë një bazë për të paktën një dekadë për ndërtime të sigurta apo për të bazuar kodet e reja apo për të bazuar çdo lloj studimi që lidhen me impaktin që ka dukuria sizmike mbi jetën socio-ekonomike në Shqipëri”, u shpreh Dushi.

Harta e re e aktivitetit sizmik do të përdoret si referencë për ndërtimet e reja dhe për planifikimet urbane.

Duke folur për rrezikun që vendi ynë ka ndaj tërmeteve Dushi u shpreh se bazuar në studimet e fundit të kryera Shqipëria është një ndër vendet më të rrezikuara të rajonit për faktin se i gjithë rajoni jonë është një rajon tektonik i cili është aktiv në aspektin sizmik për shkak të pozicionimit të tij në kontaktin e pllakave tektonike.

N.XH.SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.