Shqipëria nis pyllëzimet me dron – Risia e Universitetit Bujqësor, Toromani: Ul ndjeshëm kostot e mbjelljes së pemëve

Universiteti Bujqësor i Tiranës do të testojë mbjelljen e pemëve me dron. Prof. Elvin Toromoni thotë për TV SCAN se kjo teknikë e re, që shfrytëzon avancimin e teknologjisë, aplikohet për herë të parë në vendin tonë.

Sipas profesorit, kjo metodë ul ndjeshëm kostot e pyllëzimit, që shpesh herë kanë qenë problem në drejtim të shtimit të sipërfaqeve pyjore në vend.

Fillimisht mbjella e pemëve përmes hedhjes së farave nga droni do të testohet në 3 zona e më konkretisht në terrenet që ka në administrim Universiteti Bujqësor i Tiranës, në Korçë dhe në Pishë Porro që u përfshi nga zjarret së fundmi.

Ndërkohë që, nëse rezulton me sukses Toromani rekomandon që ajo të përdoret nga Ministria e Turizmit dhe Mjedisit në të ardhmen. Rezultatet e para të këtij procesi do të dalin në periudhën shkurt – mars të vitit që vjen.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.