Si do të bëhet reforma e pagave në administratë e privat? – Pr.ligji/ Shteti, skema shpërblimi për rritje perfomance në punë

Mungesa e fuqisë punëtore dhe emigrimi masiv kanë vënë nën presion qeverinë shqiptare, për të ndërmarrë një reformë të thellë për rritjen e pagave në administratën publike por edhe në sektorin privat. Muajt e fundit, qeveria ka vendosur të rrisë pagat e punonjësve të administratës dhe ka ndryshuar herë pagën minimale, e cila aktualisht është në nivelin 40 mijë lekë në muaj. Nga ana tjetër po harton një strategji e cila synon që deri në vitin 2025 paga minimale të jetë 45 mijë lekë në muaj dhe sektorit privat t’i vendoset një afat konkret për të ndryshuar nivelet e pagesave mujore të punonjësve.

Në mbledhjen e fundit të Këshillit të Ministrave ka kaluar edhe një projektligj i ri i cili ka si qëllim krijojë kuadrin rregullator për kompetencat për caktimin e pagave, të trajtimeve të tjera financiare dhe të përfitimeve të të punësuarve në institucionet e administratës publike, si dhe për përcaktimin e pagës bazë minimale në shkallë vendi. Drafti përcakton institucionet dhe organet që kanë të drejtë të propozojnë dhe të miratojnë ndryshim të pagave duke futur si risi edhe shpërblimin në bazë të performancës.

Referuar projektligjit, “institucionet dhe organet duhet të garantojnë shpërblimin e drejtë dhe dinjitoz të tyre, duke siguruar që institucionet/entet publike:

a) të jenë në gjendje të marrin në punë të punësuar të motivuar dhe që përmbushin me shpejtësi dhe cilësi funksionet e tyre;

b) të motivojnë të punësuarit nëpërmjet skemave të posaçme që të rrisin performancën në punë;

c) të sigurojnë një shpërblim të drejtë dhe të barabartë për punë të njëjta;

ç) të krijohet një sistem pagash, trajtimesh të tjera financiare dhe përfitimesh, që mund t’i përgjigjet nevojës për të përmbushur prioritetet;

d) të jenë në gjendje të konkurrojnë me sektorin privat për punësimin e punonjësve të talentuar.

Projektligji u jep kompetencë për caktimin e pagës, trajtimeve të tjera financiare dhe përfitimeve, sipas përkatësisë: Kuvendit; Këshillit të Ministrave; këshillave të njësive të vetëqeverisjes vendore; organeve kolegjiale drejtuese të njësive të fondeve speciale; organeve kolegjiale drejtuese të ndërmarrjeve shtetërore me kapital mbi 50 përqind shtetëror; organeve kolegjiale drejtuese të institucioneve të pavarura apo të institucioneve të administratës shtetërore, në rastet kur këto institucione financohen pjesërisht apo tërësisht nga fonde të tjera, të ndryshme nga ato të buxhetit të shtetit, dhe kur kjo kompetencë është përcaktuar shprehimisht në ligjin e krijimit dhe organizimit e funksionimit të tyre.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.