Si do të menaxhohet rreziku nga përmbytjet në disa bashki? – Nisin masat për “shpëtimin” nga baseni ujor Drin-Bunë

Përmbytjet në disa zona të vendit janë shqetësim i përvitshëm dhe krijojnë dëme të mëdha për  qytetarët, bizneset, mjedisin dhe trashëgiminë kulturore. Për të vënë në shina këtë situatë është hedhur për konsultim projekt plani i Menaxhimit të Rrezikut nga Përmbytjet për disa zona ku ekziston rreziku potencial nga përmbytjet nga baseni Drin-Bunë, siç është territori i njësive administrative Shkodër, Ana e Malit, Bërdicë, Dajç, Guri i Zi, Rrethinat dhe Velipojë dhe njësinë administrative Bushat të bashkisë Vau i Dejës. Dokumenti është hartuar nga Agjencia e Menaxhimin të Burimeve Ujore (AMBU), së bashku me mbështetjen e Qeverisë Gjermane, përmes GIZ, për vitet 2023-2028.

Objektivi kryesor i është ngritja e nivelit aktual të menaxhimit të rrezikut nga përmbytjet, duke u përqendruar veçanërisht në masat jo strukturore, si paralajmërimi, informimi, gatishmëria dhe planifikimi si dhe masat strukturore, të indetifikuara dhe parashikuara për zbatim në bashkëpunim me të gjithë aktorët përkatës përshirë këtu edhe njerëzit, organizatat, administratat dhe bizneset.

Dokumenti i shërben institucioneve shtetërore, enteve publike e private për të menaxhuar në mënyrë të harmonizuar rrezikun nga përmbytjet dhe marrjen e masave efektive, me qëllim parandalimin dhe reduktimin e pasojave të mundshme negative nga përmbytjet për shëndetin e njeriut, mjedisin, trashëgiminë kulturore dhe aktivitetin ekonomik, në zonat respektive.

Përpos objektivit të vetë dokumentit, në proceset që kanë paraprirë hartimin e tij si vlerësimi paraprak i rrezikut, indentifikimi i zonave ku ekziston rreziku potencial nga përmbytjet dhe krijimi i hartave të rrezikut dhe riskut). Proceset e ndjekura dhe dokumentet janë hartuar sipas një metodologjie të mirëpërcaktuar, në përputhje me Direktivën e BE-së, legjisacionin shqiptar dhe praktikat më të mira të referuara nga ekspertët e përfshirë në proces. Kjo qasje do të shërbejë si garanci që ky plan, i cili përfshin periudhën 6-vjecare (2023-2028), do të zbatohet dhe nëpërmjet zbatimit do të shmangë ose minimizojë pasojat që përmbytjet shkaktojnë.  Për shmangjen apo uljen e rrezikut nga përmbytjet, në territorin e projektit, janë parashikuar gjithsej 128 masa nga të cilat 41 për parandalimin e rreziqeve, 24 për mbrojtja natyrore nga përmbytjet, 45 për mbrojtjen teknike nga përmbytjet dhe 18 për gatishmërinë dhe informimin.

Elisabeta Dosku/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.