Si është ndarë “torta” e investimeve në 4-mujor? – U shpenzuan 15.2 mld lekë, 5 sektorë përfituan më shumë

Afro 15.2 miliardë lekë janë shpenzuar për investime të ndryshme në 4 muajt e parë të viti, ndërsa buxheti total i parashikuar është 114.8 miliardë lekë.  Por si u shpërndanë paratë dhe kush ka marrë më shumë vëmendje përgjatë periudhës Janar- Prill 2023?

Sipas të dhënave zyrtare nga Ministria e Financave, pjesën më të madhe të fondeve e ka marrë transporti rrugor, me rreth 6.3 miliardë lekë, para të cilat kanë shkuar për rikualifikime të akseve rrugore, ndërtim rrugësh të reja, zgjerim, përmirësim i sinjalistikës, si dhe supervizim punimesh.

Buxheti total vjetor i parashikuar për këtë zë është 23.4 miliardë lekë. Ndërsa afro  265 milionë lekë janë shpenzuar për transportin ajror, detar dhe hekurudhor. Ndërkohë, një pjesë e konsiderueshme fondesh, prej 3.4 miliardë lekësh, ka shkuar për furnizimin me ujë dhe kanalizime në disa bashki të vendit, siç janë Dropull, Kamëz, Vau i Dejës, Blesh, Këlcyrë, Divjakë, Vlorë, Tropojë, Memaliaj, Tepelenë, etj dhe investimet lidhen kryesisht me rikonstruksion dhe ndërtim ujësjellësi, supervizim punimesh,  rehabilitim të linjave, etj.

Po ashtu programet e zhvillimit të administruara nga Fondi Shqiptar i Zhvillimit mbajnë një peshë të konsiderueshme, ku në 4 muaj janë shpenzuar 970  milionë lekë, të cilat kanë shkuar më së shumti për rikualifikime urbane të qyteteve të ndryshme në vend, blloqe banimi si dhe rrugë lokale. Për arsimin bazë, të mesëm të përgjithshëm, profesional dhe atë universitar janë investuar vetëm 514 milionë lekë, kryesisht për rikonstruksione, orendi, pajisje laboratorike.

Për menaxhimin e mbetjeve urbane kanë shkuar 465 milionë lekë dhe për zhvillimin e turizmit janë shpenzuar 112 milionë lekë.  Për shërbime të kujdesit parësor dhe dytësor janë shpenzuar 319 milionë lekë,  të cilat lidhen me rikonstruksione dhe blerje pajisesh të nevojshme.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.