Si parashikohet të bëhet rritja progresive e pensioneve? – Nisma e PD-së, Juristi: Preken edhe ata që dalin rishtazi në pension

Nga nisma e Partisë Demokratike për rritjen progresive të pensioneve, për të aritur në 300 euro deri në 2029, preken jo vetëm ata që janë aktualisht në skemë, por edhe qytetarët të cilët dalin rishtazi në pension. Detajet u përcollën nga përfaqësuesi ligjor i grupit parlamentar të PD-së Marash Logu.

Nga studio e emisionit “Box to Box” Logu tha se rritja synohet, që të bëhet në mënyrë graduale, ç’ka do të thotë se përgjatë këtij viti pensionet, pavarësisht llojit të tyre të mos jenë më të ulta se 18 mijë lekë në muaj. Kjo nënkupton që të gjithë ata pensionistë që janë aktualisht nën këtë prag, të arrijnë në këtë masë përfitimi.

Por, nisma prek edhe ata që dalin rishtazi në pension. Vlera 18 mijë e lekë, propozohet që të përdoret edhe si bazë në përllogaritjen e pensioneve të reja.

I pyetur nëse ka një efekt financiar të përllogaritur, pra sesa para do të duheshin për të arritur në këto nivele pensioni, përfaqësuesi ligjor i PD-së tha se ka një faturë paraprake, por nuk mund të merret e mirëqenë duke qenë se ka munguar informacioni nga ISSH. Ndërkohë, për eksperten e ekonomisë Teuta Nunaj projektligji i depozituar në Kuvend nga Partia Demokratike nuk ka logjikë ekonomike.

Rritja në këto nivele e pensioneve, tha më tej Nunaj nuk është e pamundur por rruga për të shkuar aty nuk është e duhura. Për të rritur masën e përfitimit për pensionistët do të mjaftonin dy indeksime në harkun e një viti dhe një pension i 13-të dhe kjo të përcaktohet me ligj, në mënyrë që të mos mbetet në vullnetin e forcave politike.

Ada Hazizolli / SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.