Siguria kibernetike për Amazon, Google dhe Microsoft – BE propozon rregulla më të ashpra për kompanitë e mëdha

Amazon, Google, Microsoft i Alphabet dhe ofruesit e tjerë të shërbimeve ‘cloud’ jo të Bashkimit Europian që kërkojnë të sigurojnë një etiketë të sigurisë kibernetike të BE-së për të trajtuar të dhëna të ndjeshme mund ta bëjnë këtë vetëm nëpërmjet një sipërmarrjeje të përbashkët me një kompani me bazë në BE, sipas një draft dokumenti.

Gjigantët e teknologjisë amerikane dhe të tjerët të përfshirë në sipërmarrjen e përbashkët mund të kenë vetëm një pakicë të aksioneve dhe punonjësit që kanë akses në të dhënat e BE-së duhet t’i nënshtrohen një kontrolli specifik dhe duhet të jenë me bazë në një nga vendet e bllokut 27 anëtarësh.

Dokumenti shton se shërbimi ‘cloud’ duhet të operohet dhe mirëmbahet nga BE-ja, dhe të gjitha të dhënat e klientëve të shërbimit duhet të ruhen dhe përpunohen në BE dhe se ligjet e BE-së kanë përparësi ndaj ligjeve jo të BE-së në lidhje me ofruesin e këtij shërbimi.

Projekt-propozimi i fundit nga agjencia e BE-së për sigurinë kibernetike, ENISA, ka të bëjë me një skemë certifikimi të BE-së – EUCS – që do të garantonte sigurinë kibernetike të shërbimeve ‘cloud’ dhe do të përcaktonte se si qeveritë dhe kompanitë në bllok zgjedhin një shitës për biznesin e tyre.

Ndërsa dispozitat e reja nënvizojnë shqetësimet e BE-së për ndërhyrje nga shtetet jo anëtare të BE-së, por ka të ngjarë që të shkaktojnë kritika nga gjigantët e teknologjisë amerikane të shqetësuar për mbylljen nga tregu europian.

Big Tech po shikon tregun qeveritar të cloud për të nxitur rritjen në vitet e ardhshme ndërsa një bum i mundshëm në Inteligjencën Artificiale pas suksesit viral të ChatGPT të OpenAI mund të rrisë gjithashtu kërkesën për shërbimet cloud.

Dokumenti tregon se rregullat më të ashpra do të zbatohen për të dhënat personale dhe jopersonale me ndjeshmëri të veçantë, kur një shkelje mund të ketë një ndikim negativ në rendin publik, sigurinë publike, jetën ose shëndetin e njerëzve, ose mbrojtjen e pronësisë intelektuale. Drafti i fundit mund të copëtojë tregun e vetëm të BE-së pasi çdo vend ka lirinë e plotë për të vendosur kërkesat sa herë që e sheh të arsyeshme, sipas ekspertëve të sektorit.

Vendet e BE-së do të shqyrtojnë draftin më vonë këtë muaj, pas së cilës Komisioni Europian do të miratojë një skemë përfundimtare.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.