Skemë subvencionimi për sigurimin bujqësor – Ministria e Bujqësisë po sheh mundësinë e rimbursimit të një pjese të faturës

Edhe pse ka vite që është hedhur në tryzën e diskutimit, sigurimi bujqësor në Shqipëri vijon të mbetet i pazhvilluar kjo edhe për shkak të kostove të larta. Për këtë arsye Ministria e Bujqësisë po shikon mundësinë e subvencionimit të fermerëve, duke mbuluar një pjesë të faturës.

I ftuar në emisionin “Box to Box” zëvendësministri Arjan Jaupllari tha se kjo është mënyra më e mirë për të mbrojtur fermerët, ndërsa shtoi se është e ende herët për të thënë se në ç’mase do të mbulohet prima e sigurimit.

Veç kësaj Qeveria po shikon mundësinë edhe të ofrimit të një mbështetje për të gjitha ato familje të cilat u dëmtuan nga përmbytjet e fundit. Zëvendësministri i Bujqësisë bëri të ditur se deri më tani në bashkëpunim edhe me strukturat vendore janë identifikuar 1400 hektarë tokë e prekur, por procesi i vlerësimit ende nuk ka përfunduar.

Me rialokimin e fondeve në fundvit, do të kenë mundësi edhe blegtorët, peshkatarët dhe bletarët të marrin pjesën e mbetur të subvencionit, duke përfituar në këtë mnëyrë në masën 100 për qind pagesë. Shpërndarja do të nis në javët në vijim dhe do të bëhet përmes llogarive bankare bazuar në dokumentacionin e mëparshëëm, pra pa qenë nevoja e një aplikimi tjetër.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.