Starton emisioni “Box to Box”, në fokus pronat – Drejtori i ATP-së, Durda: Kompensim i plotë për ata me faturë deri 15 mijë USD

Nisi në televizionin “Scan” rrugëtimin emisioni më i ri “Box to Box” një hapësirë e dedikuar për trajtimin e temave dhe çështjeve që prekin drejtëpërsëdrejti qytetarët siç janë pronat, bujqësia, skema e sigurimeve, investimet dhe shëndetësia.

Në ditën e parë u diskutua për procesin e kompensimit të pronarëve të shpronësuar gjatë regjimit komunist. Janë rreth 26 mijë dosje të arkivuara në Agjencinë e Trajtimit të Pronave. Qeveria vendosi të reformojë skemën në 2016, por duket se edhe kjo nuk nuk solli rezultatet e pritshme. Në 7 vite kanë arritur të kompensohen më pak se 1 mijë familje kjo edhe për shkak të betejave ligjore. Pas miratimit të ndryshimeve ligjore procesi ka rinisur serish.

I ftuar në emisionin “Box to Box” Drejtori i Agjencisë së Trajtimit të Pronave Geraldo Durda tha se janë në shqyrtim rreth 360 dosje ndërsa sqaroi edhe hapat që duhet të ndiqen për të marrë kompensimin.

Ndërkohë janë më shumë se 10 mijë familje të cilat kanë një faturë financiare rreth 15 mijë dollar. Këto pronarë, tha Durda do të kenë mundësi të kompensohen në masë të plotë nga fondi financiar.

Lidhur me fondin fizik që Agjencia e Trajtimit të pronave disponon, janë 23 mijë hektarë tokë, e lokalizuar në 4 qarqe siç janë Korça, Elbasani, Gjirokastra dhe Berati. Por drejtori ATP bëri me dije se ka nisur një fazë e re për shtimin e sipërfaqes që do të jetë në dispozicion për kompensimin fizik të pronave. Në shenjëstër janë vënë ato toka të cilat janë përfituar abuzivisht dhe në kundërshtim me ligjin 7501 si edhe hapësira të lira në brendësi të zonave urbane të cilat nuk janë legalizuar, për pasojë jane sipërfaqe që mund të shfrytëzohen për kompensimin e pronarëve.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.