Statistikat e punësimit sipas qarqeve – Gjirokastra kryeson me forcën e punës dhe punësimin më të lartë

Sipas INSTAT forcat e punës në Shqipëri numërojnë rreth 1 mln e 411 mijë persona që përfaqësojnë popullsinë aktive të përbërë nga të punësuarit dhe të papunët në vend.

Duke e parë në rang qarku, të dhënat raportojnë se shkalla më e lartë e pjesëmarrjes në forcat e punës është regjistruar në qarkun e Gjirokastrës me 68,8%, Korçës me 66,9% dhe Elbasanit me 66,8%, ndërsa më e ulëta në qarkun e Lezhës dhe të Dibrës 47,3% dhe 48.5% përkatësisht, ndërkohë që mesatarja për vendin është 59,8%.

Ndërkaq, raporti i të punësuarave të moshës 15 vjeç e lart ndaj popullsisë të së njëjtës moshë është 52.9%, kurse shkalla më e lartë e punësimit është regjistruar në qarkun e Gjirokastrës me 65.6% e ndjekur me qarkun e Elbasanit me 62.2%. Lezha shihet si qarku me shkallën më të ulët të punësimit me 36.6% dhe Dibra me 42.7%.

Mirëpo duke analizuar punësimin sipas veprimtarive ekonomike, të dhënat tregojnë se shërbimet dhe bujqësia kanë pjesën më të madhe të të punësuarave me 44.3% dhe 33.8% përkatësisht. Të punësuarit në industri përbëjnë vetëm 21.9%.

Në sektorin e shërbimeve peshë kryesore zënë baret dhe restorantet por jo vetëm, e kësisoj Tirana është qarku me përqindjen më të lartë të punësimit në shërbime me 68.7% por me përqindjen më të ulët të punonjësve në bujqësi me 4.6%.

Pavarësisht statistikave të punësimit, në Shqipëri të papunë numërohen rreth 163 mijë njerëz. Ndërkohë shkalla më e ulët e papunësisë është në qarkun e Kukësit me 4% dhe Gjirokastrës me 4.7%, ndërsa më e lartë është në Lezhë 22.6%, Vlorë me 19.5% dhe Durrës me 16.1%. Përsa i përket qarkut të Tiranës, Dibrës dhe Shkodrës shkallën e papunësisë e kanë të ngjashme me mesataren e vendit.

Në bazë të analizës gjinore, statistikat tregojnë se qarku me nivelin më të lartë të papunësisë për gratë është ai i Vlorës me 24.3% e vijuar me qarkun e Durrësit me 18.9%. Ndërsa qarku i Lezhës ka qarkun më të lartë të papunësisë me 26.1 e më pas Dibra me 17.2%.

Diamila Leka / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.