Studimi: Alkooli mund të jetë një zgjidhje e krizës ushqimore!

Shumë njerëz në hemisferën veriore e kanë kaluar verën duke kërkuar një pije në fund të ditës për të ulur disi nxehtësinë përvëluese dhe të thatë. Rezulton se një e tillë mund të jetë pikërisht ajo që u nevojitet edhe bimëve.

Një studim i rishikuar nga kolegët e botuar të enjten në revistën Plant and Cell Physiology sugjeron se etanoli ose alkooli mund të ndihmojnë bimët të mbijetojnë në kohë thatësire, madje edhe për dy javë pa ujë.

Kur bimët janë të privuar nga uji, ato prodhojnë natyrshëm etanol. Edhe pse arsyet e prodhimit të tij janë të panjohura, ajo i shtyu studiuesit nga Qendra RIKEN për Shkencën e Burimeve të Qëndrueshme në Japoni të teorizojnë se dhënia e alkoolit bimëve mund t’i mbrojë ato nga vdekja në një thatësirë.

Gjetjet nuk janë të dobishme vetëm për kopshtet e botës, por edhe për fermat që rritin kultura jetike si orizi dhe gruri. Të korrat kryesore të mbrojtura nga thatësira mund të ndihmojnë në zbutjen e pasigurisë ushqimore, e cila është një çështje që prek shumë pjesë të botës tani, e përkeqësuar nga valët e të nxehtit, lufta e Rusisë në Ukrainë dhe problemet e zinxhirit të furnizimit.

Studiuesit thanë se etanoli ishte një mënyrë “e dobishme dhe e thjeshtë” për të rritur prodhimin e ushqimit në të gjithë botën në kohë thatësire ose mungesë uji.

Për të arritur në gjetjet e tyre, studiuesit rritën bimë gruri dhe orizi, duke i ujitur rregullisht dhe më pas shtuan etanol në tokë në një grup bimësh për tre ditë. Më pas, ata i privuan të dy grupet nga uji për dy javë dhe zbuluan se bimët e dehura ecnin më mirë se të tjerat. Rreth 75% e bimëve të grurit dhe orizit të trajtuara me etanol mbijetuan, ndërsa më pak se 5% e bimëve të patrajtuara mbijetuan.

Por etanoli duhej përdorur me masë, pasi “përqendrimi më i lartë i etanolit pengon rritjen e bimëve”. Me fjalë të tjera, mos e provoni këtë në shtëpi.

Studimi gjithashtu shikoi se si etanoli mbron një bimë. Duke përdorur arabidopsis, një bimë e vogël e përdorur zakonisht në eksperimente, studiuesit zbuluan se kur mostrat e trajtuara me etanol u privuan nga uji, hapje të vogla në sipërfaqen e gjetheve të quajtura stomata, mbylleshin, duke mbajtur ujin dhe nxehtësinë.

Studimi analizoi shprehjen e gjeneve të arabidopsis dhe zbuluan se bimët e trajtuara me etanol filluan të silleshin sikur po përjetonin thatësirë, edhe para se të privoheshin nga uji.

Kjo shprehje e gjeneve u jep bimëve një fillim në përgatitjen për një thatësirë, shpjegoi studimi, duke shtuar se etanoli përdoret gjithashtu nga bimët për të prodhuar sheqernat e nevojshme për të prodhuar energji.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.