Stuhia Ciarán vret 5 persona dhe shkakton reshje rekord edhe në Itali!

Shiu rekord shkaktoi përmbytje në një zonë të gjerë të rajonit të Toskanës të Italisë, pasi stuhia Ciarán u fut në vend gjatë natës duke bllokuar banorët në shtëpitë e tyre, duke përmbytur spitalet dhe duke përmbysur makina. Të paktën pesë persona u vranë, duke e çuar numrin e të vdekurve nga stuhia në Europën Perëndimore në 12 të premten.

Autoritetet italiane të Mbrojtjes Civile thanë se 200 milimetra shi ranë në tre orë, nga qyteti bregdetar i Livornos në luginën e brendshme të Mugello, dhe shkaktuan vërshimin e brigjeve të lumenjve. Video tregon të paktën një duzinë makinash duke u shtyrë në një rrugë të përmbytur. Guvernatori i Toskanës, Eugenio Giani tha se pesë njerëz vdiqën në stuhinë, e cila hodhi një sasi reshjesh të pa regjistruara në 100 vitet e fundit.

Shkencëtarët e klimës thonë se ndryshimi i klimës i shkaktuar nga njeriu ka çuar në reshje më të mëdha shiu gjatë stuhive si Ciarán, shpesh duke rezultuar në dëme më të rënda. Rajone të tjera ishin në gatishmëri të lartë dhe autoritetet paralajmëruan se stuhia po shkonte drejt Italisë jugore.

Ciarán la të paktën shtatë njerëz të vdekur ndërsa përfshiu Spanjën, Francën, Belgjikën, Holandën dhe Gjermaninë të enjten. Stuhia shkatërroi shtëpitë, shkaktoi kaos në udhëtime dhe ndërpreu energjinë për një numër të madh njerëzish.

Ndërsa stuhia po kalonte, ajo përmbyti të paktën katër spitale, duke përfshirë në Pisa dhe Mugello. Në të gjithë Toskanën, linjat e trenave dhe autostradat u ndërprenë dhe shkollat u mbyllën. Qindra njerëz nuk ishin në gjendje të ktheheshin në shtëpi, përfshirë rreth 150 të bllokuar në Prato pasi një linjë treni u pezullua të enjten mbrëma. Rreth 40,000 njerëz ishin pa energji elektrike të premten.

Stuhia u tërhoq në Francën veriore dhe në bregun e Atlantikut të premten, por reshjet e dendura vazhduan në disa rajone pasi punonjësit e urgjencës pastruan mbeturinat e një dite më parë. Ndërkohë, Korsika në Mesdhe u përball me erëra jashtëzakonisht të forta të premten deri në 140 km/h dhe rajonet në Pirenejtë në jugperëndim ishin nën paralajmërimet për përmbytje.

Më shumë se gjysmë milioni familje franceze mbetën pa energji elektrike për të dytën ditë, kryesisht në rajonin perëndimor të Brittany. Trenat u ndaluan në disa zona dhe shumë rrugë mbetën të mbyllura. Presidenti francez Emmanuel Macron udhëtoi të premten në zonat e shkatërruara nga stuhia të Brittany dhe kryeministrja Elisabeth Borne po udhëtonte për në zonat e goditura fort të Normandisë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.