Subvencionet për fermerët nuk frenojnë importin – Gjatë vitit 2023, u shpenzuan rreth 36 milionë euro për fruta-perimet

Raporti mes eksportit dhe importit në Kosovë sërish shkakton reagime pasi dhe gjatë 2023-shit, vendi më tepër ka importuar se sa ka eksportuar, me një diferencë shumë të madhe. Eksportet e Kosovës në vitin 2023 ishin rreth 820 milionë euro, ndërsa importet 5.77 miliardë euro.

Por ajo që bie në sy është se Kosova vazhdon të importojë gjatë vitit edhe sasi të konsiderueshme të frutave dhe perimeve, për kultivimin e të cilave në vijimësi ofrohen subvencione dhe grante nga qeveria.

Sipas të dhënave nga Dogana e Kosovës, të cilave u është referuar Instituti GAP, gjatë vitit që lamë pas vendi ka importuar rreth 12 milionë euro domate. Po sipas këtyre të dhënave, për importin e patateve, janë paguar 6.3 milionë euro.

Nëse Maqedonia e Veriut është vendi drejt të cilit niset pjesa më e madhe e eksporteve, Turqia mbetet partneri kryesor për sasinë më të madhë të importeve.

Sipas të dhënave edhe për qepë dhe mollë, që kultivohen në sasi të mëdha në vend, janë shpenzuar shifra të konsiderueshme. Sipas të dhënave, për importin e mollëve nga vendet e rajonit e më gjerë janë shpenzuar 5.6 milionë euro, ndërsa për qepë u shpenzuan 4.8 milionë euro.

Kosova importoi edhe rrush gjatë vitit 2023, pavarësisht se vendi njihet për kultivimin e rrushit cilësor. Plot 3.4 milionë euro u shpenzuan për importin e rrushit, referuar të dhënave të Doganës së Kosovës. Kosova po ashtu gjatë vitit 2023 ka importuar dhe kumbulla në vlerë prej 748 mijë euro, qershi 200 mijë euro, hudhra 83 mijë euro, si dhe luleshtrydhe 47 mijë euro.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.