Sulmi kibernetik, publikohen emailet e kryeministrit! Pak ditë më parë u deklarua se nuk ka humbje të dhënash

Hakerat që kanë marrë përsipër sulmin kibernetik ndaj portalit unik qeveritar E-Albania duke e nxjerrë jashtë funksionit për disa javë, kanë vijuar publikimin e materialeve.

Faqja e emërtuar “Homeland Justice”,  e cila është e aksesueshme vetëm nga jashtë Shqipërisë për faktin se është bllokuar nga autoritetet shqiptare, ka publikuar disa materiale në të cilat pretendohet se janë emailet e kryeministrit Edi Rama.

Në materialet e publikuara lexohen emaile që kanë mbërritur në adresën zyrtare të kryeministrit nga qytetarë që kanë shqetësime të ndryshme, për të cilat i janë drejtuar për zgjidhje kryeministrisë.

Pak ditë më parë, në daljen e parë për mediat që pas sulmit kibernetik, drejtuesja e Agjencisë Kombëtare të Shoqërisë së Informacionit siguroi se nga sulmi kibernetik nuk janë dëmtuar të dhënat e shqiptarëve dhe se falë reagimit të shpejtë nuk ka pasur humbje.

Në këtë deklaratë u njoftua se objektivi i sulmit kibernetik ishte fshirja e të gjitha sistemeve kritike të rëndësishme qeveritare, sëbashku me të dhënat në to.

Megjithatë, sipas drejtueses së AKSHI-t, falë reagimit të shpejtë të sistemeve mbrojtëse dhe të stafeve teknike, nuk pati humbje të dhënash.

Nga ana tjetër, u njoftua gjithashtu se po kryhen dy hetime paralele, në njërin prej të cilëve është përfshirë edhe Byroja Federale e Hetimit (FBI).

Megjithatë, pas kësaj deklaratë, fundjavën që sapo kaloi, u publikuan disa dokumente sensitive për sigurinë kombëtare e tani, edhe emailet e kryeministrit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.