Taksa “surprizë” për bankat në Itali – Ministri i ekonomisë qetëson situatën: Mund të përmirësohet

Taksa e re e Italisë mbi fitimet bankare mund të përmirësohet, deklaroi ministri i ekonomisë Giancarlo Giorgetti, duke mohuar se vendosja e saj ishte e padrejtë. Ai shtoi se ajo mund të përmirësohet, por kurrësesi të konsiderohet e pavend.

Muajin e kaluar, qeveria italiane i dha një goditje befasuese bankave të vendit duke paralajmëruar vendosjen e një takse prej 40% mbi fitimet e huadhënësve që rrjedhin nga normat më të larta të interesit, pasi kritikoi huadhënësit për mosshpërblimin e depozitave.

Aksionet e bankave ranë përpara se Ministria e Ekonomisë të sqaronte se taksa e re do të arrinte jo më shumë se 0.1% të totalit të aktiveve të tyre. Rreth 33% e të anketuarëve u shprehën në mënyrë shumë negative për masën dhe dy të tretat ishin përgjithësisht kundër saj.

Giorgetti e kundërshtoi këtë qëndrim duke thënë se ishte një taksë e drejtë dhe shteti kishte dhënë shumë garanci për sistemin bankar. Megjithatë, ministri kërkoi falje për trajtimin ‘e ngathët’ të projekt-propozimit.

Ai theksoi se merrte përgjegjësinë e plotë për gabimet në komunikim, por në fund versioni përfundimtar do të jetë diçka që të gjithë do ta vlerësojnë. Partia bashkëqeverisëse ‘Forza Italia’ dëshiron të përjashtojë kthimet e bonove të qeverisë nga taksa e re, konfirmoi lideri i saj Antonio Tajani, në mënyrë që të mos ndikojë në ankandet e ardhshme të obligacioneve.

‘Forza Italia’ po kërkon gjithashtu një përjashtim për bankat e vogla si dhe kërkon një garanci se taksa nuk do të zgjatet përtej vitit 2023. Giorgetti nuk komentoi propozimet e aleatit të tij të qeverisë për taksën bankare. Ai gjithashtu nuk dha asnjë shpjegim se kur do të privatizohej banka ‘Monte dei Paschi di Siena’, pavarësisht thirrjes së Tajanit për veprim të shpejtë. Giorgetti shtoi se situata do të zgjidhet me qetësi dhe askush nuk do të lejohet të caktojë afate dhe orare për sa i përket sistemit bankar.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.