Tarifat e ujit mund të krijojnë reaksione të konsumatorëve – ERRU: Unifikimi, duhen subvencione nga qeveria

Enti Rregullator i Ujit parashikon vështirësi në unifikimin e tarifave nga shoqëritë rajonale të Ujësjellës Kanalizime, që janë krijuar pas reformës të ndërmarrë vitin që shkoi. Sipas ERRU-së, për disa shoqëri rajonale unifikimi tarifor paraqet problematika duke qenë se diferencat e tarifave aktuale ndërmjet zonave janë të mëdha, për shkak të kostove mjaft të ndryshme të operimit dhe të cilësisë së shërbimit në njësitë përbërëse të tyre.

Po ashtu, sipas Entit, një unifikim i sforcuar i tarifave në të gjithë zonën e shërbimit, që sjell një rritje të menjëhershme të tyre në njësitë me tarifa relativisht të ulta, mund të sjellë reaksione të forta nga konsumatorët me pasojë ulje të normës së arkëtimit dhe ulje të aftësive likuiduese financiare të shoqërisë. Për këto arsye, Enti Rregullator i Ujit sugjeron që unifikimi i tarifave për këto shoqëri mund të realizohet në bashkërendim të ngushtë në nivel strategjik me qeverinë qendrore dhe ERRU-në për të parashikuar një politikë të përshtatshme subvencionimi në vlerë dhe kohë, në mënyrë që unifikimi të bëhet gradualisht dhe i pranueshëm për konsumatorët.

Po ashtu, duke qenë se metodologjia ofron mundësinë e planifikimit tarifor me rritje graduale nga viti në vit, unifikimi i tyre rekomandohet të realizohet në dy faza. Së pari të bëhet unifikimi për ato njësi që kanë tarifë të përafërt dhe më pas gradualisht deri në unifikimin e plotë të tyre. Reforma e ndërmarrë parashikoi riorganizimin e sektorit nga 58 shoqëri UK në 15 Shoqëri UK Rajonale me qëllim rritjen e qëndrueshmërisë financiare të shoqërive dhe përmirësimin e cilësisë së shërbimit ndaj konsumatorëve. Deri më tani janë krijuar 12 shoqëri ujësjellës kanalizime rajonale, që përfshijnë 50 bashki. Ndërkohë që mbeten akoma 11 bashki të cilat sipas parashikimeve të reformës në sektor do të jenë pjesë e 3 shoqërive UK Rajonale, përkatësisht: Shkodër, Tiranë dhe Vlorë.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.