“Të mëdhenjtë” paguajnë më shumë tatim mbi Dividentin – Shifrat zyrtare/ Në 2022-shin tatimet arkëtuan 37.5 milionë euro
Bizneset e mëdha kanë paguar më shumë tatim mbi dividentin e gjeneruar përgjatë vitit që lamë pas, çka do të thotë se edhe qarkullimi dhe fitimi ka qenë më i lartë. Referuar të dhënave zyrtare nga Drejtoria e Përgjithshme e Tatimeve, tatimi mbi të ardhurat nga Dividentët dhe Aksionet për vitin 2022 regjistrohet në vlerën e 37.5 milionë euro, me një rritje prej 5.3 milion euro krahasuar me vitin 2022.
Tatimi mbi dividentin apo e thënë ndryshe mbi pjesa e fitimit që merr secili aksionar i një ndërmarrjeje sipas kapitalit që ka derdhur prej vitesh aplikohet normën 8 për qind gjë që nuk ka ndryshuar as me ligjin e ri për tatimin mbi të ardhurat i cili u miratua në Parlament këtë muaj.
Deklarimi i shumës së dividentit, bëhet përmes deklaratës së tatimit të mbajtur në burim, e cila dorëzohet online në administratën tatimore. Shoqëritë tregtare, sipas ligjit “Për tregtarët dhe shoqëritë tregtare”, të ndryshuar, pas pagimit të tatimit mbi fitimin, brenda një afati prej 6 muajsh nga data e mbylljes së vitit financiar, duhet të miratojnë në asamblenë e ortakëve apo organin kompetent vendimmarrës të shoqërisë rezultatet financiare të vitit paraardhës dhe ta destinojnë fitimin pas tatimit, duke përcaktuar shumën e rezervave ligjore, pjesën që do të përdoret për investime ose për shtesë kapitali dhe pjesën që do të shpërndahet në formë dividendi.
Ndërsa referuar ligjit në fuqi për “Tatimin mbi të ardhurat” personi juridik duhet të deklarojë dhe të paguajë për llogari të administratës tatimore tatimin mbi dividendin e pagueshëm, jo më vonë se data 20 gusht e vitit kur bëhet miratimi i rezultateve, pavarësisht nëse është bërë ose jo shpërndarja e dividendit. Detyrim për pagesën e tatimit e kanë shoqëritë aksionere, shoqritë kolektive, shoqëritë komandite dhe shoqëritë më përgjegjsi të kufizuar.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.