Nisin rikonstruksionet në fshatrat turistikë – Hapet tenderi për mirëmbajten e shëtitoreve në Jalë, Himarë, Qeparo e Dhërmi

Pragu i sezonit turistik 2023 ka vënë në lëvizje bashkitë në jug të vendit për rikonstruksionin dhe mirëmbajtjen e qyteteve me qëllim funksionalitetin e duhur për tërheqjen e turistëve vendas dhe të huaj në këto zona. Për mirëmbajtjen e Jalës, Himarës, Dhërmisë dhe Qeparos, Bashkia Himarë ka hapur tenderin me vlerë rreth 4.1 milionë lekë.

Si pasojë e dëmtimeve të marra nga dora njerëzore por dhe nga natyra për shkak të stuhive në këto zona, do të ndërmerren punime të tilla si montimi i konstruksioneve metalike për psihat e dëmtuara nga stuhitë, lyerje me bojë të shëtitoreve, pastrim dhe sistemim të plazhit nga inerte të ndryshme etj.

Konkretisht për shëtitoren e Dhërmiut do të riparohen muret dekorative të dëmtuara nga deti, do të pastrohet bregdeti nga bazat e ndryshme dhe inertet, do të riparohen stolat e dëmtuar. Përsa i përket shëtitores së Jalës do të riparohen muret dekorative me gurë të vjetër, zëvendësimi i koshave të mbeturinave dhe lyerja e tyre. Ndërkohë shëtitorja e Himarës riparimet përfshijnë trotuaret dhe muret përreth të dëmtuar nga dallgët e detit. Gjithashtu dëmtimet elektrike dhe zëvendësimi i llambave në shëtitore.

Në të njëjtën gjendje ndodhet dhe shëtitorja e Qeparoit e cila do t’i nënshtrohet këtyre rikonstruksioneve. Jalë, Dhërmi, Himarë dhe Qeparo janë zona bregdetare që tërheqin një pjesë të madhe të turistëve vendas dhe të huaj çdo vit.

Marinela Lina/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.