Tenderi 10.5 milion euro i OSHEE ankimohet në KPP – Matësit inteligjentë / Shkak, ankesa e një kompanie. Opozita ka akuzuar për paligjshmëri

Tenderi me vlerë 10.5 mln euro, për sistemin e matjes inteligjente, i hapur nga Operatori i Shpërndarjes së Energjisë Elektrike, është pezulluar. Shkak është bërë ankesa e një operatori ekonomik pranë Komisionit të Prokurimit Publik, që pretendon se disa kritere dhe specifikime teknike kufizojnë konkurrencën dhe nuk sigurojnë trajtimin e barabartë dhe jodiskriminues për të gjithë operatorët ekonomikë pjesëmarrës në procedurat e prokurimit publik.

Po ashtu, në ankesë kompania GSA thekson se si nje ofertues i mundshem per te marre pjese ne tender ka bere 4 kerkesa per sqarim ne lidhje me paqartesi ne dokumentacionin e tenderit, por nuk ka marrë asnjë përgjigje nga OSHEE. “Ky veprim nuk krijon transparencën e kërkuar nga ligji, duke sjelle konfuzion si dhe diskriminim për ofertueset e mundshem”, – shtohet në ankesë. Tenderi i OSHEE Group për instalimin e te sistemit të Matjes Inteligjente në Kabinat Elektrike të OSSH , u hap në fund të muajit mars.

Shpallja e procedurës u pasua nga një sërë akuzash nga deputetët e opozitës në komisionet parlamentare, pasi sipas tyre OSHEE Group nuk ka asnjë tagër të hapë këtë tender, përsa kohë është bërë ndarja e kompanisë. Procedura tenderuese e hapur është me vlerë mbi kufirin e lartë monetar, teksa fondi limit i vënë në dispozicion arrin në rreth 10.5 mln euro, me TVSH. Në dokumentet e tenderit specifikohej se instalimi i Sistemit te Matjes Inteligjente dhe Rrjetave Inteligjente, perfshijne platformen e vendosjes se matesave inteligjente ne konsumatoret fundore, platformen e vendosjes se matesave bilanciere ne kabinat elektrike si dhe platformen e verifikimit dhe kontrollit te tyre.

Sipas OSHEE instalimi i tyre do të ndikojë në reduktimin e vjedhjeve të energjisë elektrike, uljen e humbjeve teknike dhe uljen e kostove të mirëmbajtjes. Këta matës mundësojnë lexim automatik, çka do të thotë se lexuesit e matësve do të duhet të largohen nga puna.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.