Tërmetet në Shqipëri/ Bashkia e Durrësit, Lezhës dhe Fierit pajisen mjete për kërkim–shpëtim të cilësisë së lartë!

Programi i Kombeve të Bashkuara për Zhvillimin UNDP ka bërë me dije se Bashkia e Durrësit, Lezhës dhe Fierit, janë pajisur me 3 kontejnerë me të gjitha pajisjet dhe mjetet për kërkim – shpëtim në raste tërmetesh në zonat urbane.

Sipas njoftimit kontejnerët kanë të gjitha mjetet dhe pajisjet më të fundit dhe të cilësisë më të lartë për operacionet e kërkim-shpëtimit gjatë tërmeteve dhe gjithashtu përveç këtyre pajisjeve, UNDP organizoi një trajnim për zjarrfikësit e bashkive përkatëse për t’u siguruar që ata të jenë të aftë për njohjen, përdorimin dhe mirëmbajtjen e sigurtë të pajisjeve.

“Vënia në dispozicion e këtyre mjeteve dhe pajisjeve moderne do të përmirësojë ndjeshëm kapacitetet logjistike dhe operacionale të zjarrfikësve për përballimin e fatkeqësive natyrore të shkaktuara nga njeriu, duke bërë një ndryshim të madh në sigurinë e jetës së banorëve të Durrësit, Lezhës dhe Fierit,” shkruhet në njoftim.

Bazuar në informacionin e publikuar dhurimi i këtyre pajisjeve është pjesë e projektit “Forcimi i Kapaciteteve të Shërbimit Shqiptar të Mbrojtjes nga Zjarri dhe Shpëtimit”, i cili financohet nga qeveria e Polonisë dhe zbatohet nga UNDP në Shqipëri.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.