Tetra Pak largohet nga Rusia – Kompania e paketimit ushtronte aktivitetet në vend prej 62 vitesh

Kompania ndërkombëtare e paketimit Tetra Pak deklaroi se do të largonte nga Rusia të gjitha aktivitetet e mbetura pas 62 vitesh në vend.

Shumë kompani perëndimore janë larguar nga Rusia ose kanë shpallur synimin e tyre për ta bërë këtë pasi Moska dërgoi dhjetëra mijëra trupa në Ukrainë më 24 shkurt në atë që e quan një “operacion ushtarak special”.

Tetra Pak në muajin mars pezulloi të gjitha investimet dhe projektet e reja në Rusi, duke kufizuar operacionet e saj në artikujt ushqimorë thelbësorë – në përpjekje për të krijuar vazhdimësi për klientët si dhe për të minimizuar ndikimin tek punonjësit, me anë të kalimit të kompetencave tek një kompani e re dhe e pa emërtuar deri tani.

Në një deklaratë për mediat u bë e ditur se largimi nga vendi u vendos për shkak të pasojave të kufizimeve të eksporteve në Rusi që krijojnë një zinxhir furnizimi të paqëndrueshëm, si rezultat i të cilit kompanisë nuk i mbetet asnjë mundësi tjetër përveç largimit nga vendi. Pas transferimit të pronësisë, kompania e re do të operojë si një subjekt i pavarur me një emër të ri dhe nuk do të jetë e lidhur me Tetra Pak.

Industria ruse e paketimit po lufton për të përballuar pasojat e sanksioneve. Mungesa e furnizimeve ka bërë që kutitë e lëngjeve zakonisht shumëngjyrëshe të shtypen kryesisht në ngjyrë të bardhë, si tregojnë dhe pamjet e filmuara nga Reuters.

Tetra Pak, e cila gjithashtu ka prodhuar kuti me lëngje që nuk kanë ngjyrat e tyre të zakonshme, tha se ky ishte një shembull se si ishin ndikuar zinxhirët e furnizimit.

Kur iu dorëzua një kuti lëngu frutash me ngjyrë të bardhë, e boshatisur, nga një gazetar në Forumin Ekonomik Ndërkombëtar të Shën Petersburgut muajin e kaluar, Presidenti Vladimir Putin tha se sovraniteti dhe pavarësia ishin të rëndësishme për Rusinë, jo problemet e saj të paketimit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.