Tregjet europiane, me ndryshime të vogla – Rezerva Federale paralajmëron për një recesion të lehtë në SHBA

Bursat europiane janë hapur me ndryshime të vogla edhe në sesionin e sotëm, pasi investitorët i kanë mirëpritur të dhënat mbi inflacionin në SHBA, që u publikuan të mërkurën.

Indeksi pan-Europian Stoxx 600 e ka nisur ditën në rritje me 0.2%, ndërsa shumica e sektorëve janë në territor pozitiv. Indeksi i Çmimeve Konsumatore në SHBA u rrit me 0.1% me bazë mujore, gjatë marsit, dhe me 5% me bazë vjetore. Megjithatë, inflacioni është ende shumë larg objektivit të Rezervës Federale, por po shfaq shenja reale të ngadalësimit.

Investitorët po analizojnë edhe procesverbalin e takimit të fundit të Rezervës Federale, i cili tregoi se politikëbërësit po përgatitet për një recesion të lehtë gjatë këtij viti. Investitorët besojnë se Banka Qendrore Amerikane mund të bëjë një pauzë, me rritjen e interesave, edhe për shkak të problemeve me likuiditetin që shfaqën disa banka.

Referuar zhvillimeve të tjera, ekonomia e Mbretërisë së Bashkuar njohu 0% rritje, gjatë muajit shkurt, por rritja gjatë janarit ishte më e lartë se vlerësimet fillestare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.