Tregu monetar vijon qëndrueshmërinë – Investitorët presin dëshminë e Powell në kongresin amerikan

Tregu monetar vijon qëndrueshmërinë edhe në sesionin e sotëm, sepse investitorët po presin dëshminë e shefit të Rezervës Federale, Jerome Powell, përpara Kongresit amerikan, më vonë gjatë ditës së sotme. Megjithatë, një mbështetje të lehtë, monedha e gjelbër e ka gjetur nga të dhënat pozitive mbi tregun e pasurive të paluajtshme në SHBA. Sipas të dhënave zyrtare, lejet e ndërtimit për shtëpitë familjare u rritën me 21.7%, gjatë majit, ndërsa analistët parashikonin një rritje modeste.

Euro po këmbehet në mbi 1.09 dollarë edhe në sesionin e sotëm, ndërsa paundi britanik po këmbehet me rreth 1.2760 dollarë. Investitorët po presin të dhënat mbi inflacionin në Mbretërinë e Bashkuar, që publikohen më vonë gjatë ditës së sotme, të cilat do të jenë vendimtare në lidhje me politikën monetare që do të ndjekë Banka e Anglisë të enjten.

Analistët parashikojnë se banka qendrore do të rrisë normën bazë të interesit edhe me 25 pikë bazë dhe kjo do të jetë rritja e 13 me radhë. Në tregun e kriptomonedhave, bitcoin është rritur me rreth 5% në sesionin e kaluar pranë 28 mijë dollarëve, për herë të parë që nga fundi i majit. Ethereum po tregtohet në rreth 1810 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.