Turqia dhe Greqia nisin ‘luftë fjalësh’ mbi ishujt e Detit Egje!

Një luftë fjalësh në përshkallëzim ka shpërthyer mes Turqisë dhe Greqisë për ishujt në detin Egje, me të dyja palët që tani shkëmbejnë akuza dhe kërcënime në gjuhën e njëra-tjetrës. Presidenti turk Rexhep Tajip Erdogan paralajmëroi të enjten Athinën që të çmilitarizojë ishujt që ai pretendon se i janë dorëzuar Greqisë në mënyrë paqësore.

Ankaraja ka akuzuar autoritetet greke për ndërtimin e një pranie ushtarake në kundërshtim me Traktatin e Lozanës të 1923 dhe Traktatin e Parisit të vitit 1947, të cilat garantojnë statusin e paarmatosur të ishujve. Erdogan deklaroi se ai “nuk bën shaka” dhe madje postoi në Twitter në greqisht dhe anglisht në një ashpërsim të theksuar të retorikës kundër fqinjit të Turqisë dhe rivalit historik rajonal.

Greqia ka deklaruar se ishujt — të vendosura në distancë goditëse nga një flotë e madhe zbarkuese turke nuk mund të lihen të pambrojtura dhe kanë qenë të garnizonit për dekada. Ndërsa të dy vendet janë aleatë të NATO-s, ata janë përfshirë prej kohësh në mosmarrëveshje mbi emigrimin, kufijtë detarë dhe kërkimin e mineraleve në Mesdheun lindor.

Greqia thotë se Turqia ka keqinterpretuar qëllimisht traktatet ndërkombëtare dhe thotë se ka baza ligjore për të mbrojtur veten kundër veprimeve armiqësore të Ankarasë. Pasi Erdogan vendosi të postonte në greqisht, një zëdhënës i qeverisë në Athinë e përshkroi atë si “të spikatur”.

“Greqishtja njihet si gjuha e arsyes, lirisë dhe drejtësisë,” tha Giannis Oikonomou. Taktikat që ka zgjedhur Turqia nuk i përkasin asnjërës prej këtyre kategorive. Oikonomou kishte thënë më herët se Greqia po përballej me “provokimet” turke me “qetësi dhe vendosmëri”.

Madje, ish-kryeministri grek Alexis Tsipras i është përgjigjur Erdogan në turqisht. “Greqia do të mbrojë sovranitetin e saj kundër të gjitha llojeve të kërcënimeve”, shkroi ai në Twitter. “T’i japim fund provokimit dhe t’i kthehemi dialogut në bazë të së drejtës ndërkombëtare”.

Muajin e kaluar, Erdogan tha se do të ndalonte së foluri me kryeministrin grek Kyriakos Mitsotakis, pas komenteve që kreu grek bëri gjatë një udhëtimi në SHBA.

“Unë mendoj se jemi ende shumë larg nga ajo pikë, larg tensionit që kishim në verën e vitit 2020,” tha Mitsotakis duke iu referuar një kohe kur tensionet u ndezën midis Greqisë dhe Turqisë mbi të drejtat e kërkimit të gazit në Mesdheun lindor. “Sot, të gjithë duhet të tregojnë përmbajtje,” tha ai, duke komentuar tensionet midis Athinës dhe Ankarasë, “veçanërisht në një kohë kur po përballemi me një sfidë shumë të madhe në NATO me pushtimin rus të Ukrainës. Duhet të jemi të bashkuar”.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.