Bashkitë, 12 punonjës për 1 mijë banorë – Cilat janë 5 njësitë e “fryra”? 2021-shi shënon rekord shpenzimesh për punonjësit

Rritja e efiçiencës në përdorimin e burimeve financiare në dispozicion është sfidë e vazhdueshme për bashkitë në Shqipëri . Zgjerimi i gamës së shërbimeve publike vendore për t’u kryer nga bashkitë në vijim të Reformës Adiministrativo Territoriale në vitin 2015,  rriti ndjeshëm shpenzimet e tyre për personelin  në +53.4% në terma vjetorë.  Ndërsa Pas shuarjes së këtij efekti, rritja e shpenzimeve për personelin ka qenë e qëndrueshme vit pas viti me një normë mesatare prej rreth 7%.

Sipas të dhënave të pasqyruara në Raportin e Financave Publike në fund të vitit 2021, buxheti me fonde të veta për shpenzime për personelin shënoi një nivel prej rreth 23.9 miliardë lekë, në rritje me rreth 7.8% krahasuar me një vit më parë dhe përfaqësoi rreth 46% të shpenzimeve me fonde të veta për të njëjtën periudhë. Ky është niveli më i lartë historik i shënuar për shpenzimet e personelit me fonde të veta të bashkive, përcaktuar pjesërisht nga rritja e numrit të të punësuarve në bashki me rreth 2.2% në terma vjetorë në fund të vitit 2021.

Analiza në terma nominalë e numrit të të punësuarve dhe shpenzimeve për personelin janë një hap i parë për të vlerësuar mbi ofrimin e shërbimeve publike vendore dhe përdorimin e burimeve financiare në dispozicion. Një tregues i përdorur gjerësisht në literaturë për të vlerësuar mbi nivelin e ofrimit të shërbimeve publike vendore është numri i të punësuarve për 1,000 banorë. Krahasuar menivelin benchmark të përdorur nga Banka Botërore prej më pak se 25 punonjës për 1,000 banorë, rezulton se 54 bashki kanë një nivel të ulët se referenca.

Në të kundërt, 5/61 bashki , konkretisht bashkitë Dropull, Këlcyrë, Fushë Arrëz, Përmet dhe Skrapar,  qëndrojnë mbi këtë nivel referencë, duke sugjeruar për mbi-ngarkesë të punonjësve në raport me popullsinë e bashkisë. Në bashkitë Pukë dhe Tepelenë raporti i numrit të punësuarve për 1,000 banorë është I barabartë me nivelin referencë. Niveli mesatar i treguesit për 61 bashkitë në vend vlerësohet në rreth 12 punonjës për 1,000 banorë,  me një nivel minimal prej rreth 7 të punësuar për 1,000 banorë në bashkinë Kamëz dhe Shkodër; nivel maksimal prej rreth 40 të punësuar për 1,000 banorë në bashkinë Dropull.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.