Twitter rikthen abonimin me pagesë – Përdoruesit e Apple duhet të paguajnë më shumë se të tjerët

Elon Musk hidhet sërish në sulm duke ripropozuar Twitter-in me abonim dhe goditur në të njëjtën kohë dhe Apple. Pronari i platformës sociale deklaroi se që nga kjo e hënë e 12 dhjetorit, jo vetëm do të rikthehet abonimi mujor por çmimi do të rritet në 7 dollarë për ata që abonohen nga kompjuterat dhe deri në 11 dollarë për ata që përdorin pajisje të Apple.

Twitter Blue, është ky emri i sistemit të abonimeve premium, u prezantua nga Musk në fillim të muajit nëntor duke shkaktuar polemika dhe largime nga platforma. U pezullua disa ditë por tashmë është rikthyer duke filluar nga Shtetet e Bashkuara të Amerikës, Kanadaja, Australia dhe Zelanda e Re. Ideja ndoshta është ajo e një testimi para se të përhapet kudo në botë.

Abonimi me pagesë lejon ngarkimin e videove me përmasa më të mëdha, pasja e postimeve në qendër të vëmendjes por dhe mundësia e korrigjimit apo fshirjes pas publikimit. Gjithashtu reduktohen reklamat, dhe cdo profil i verifikuar do të shoqërohet nga simboli i Twitter në ngjyrë blu. Nëse deri tani ky status përfitohej me punën dhe biografinë e secilit, duke treguar se kush je dhe cfarë shkruan, tashmë atë mund ta blesh.

Por ka dhe më shumë. Vetë Musk premtoi dhe mundësinë për të ndryshuar emrin e përdoruesit dhe fotografinë e profilit. Vendimi i fundit i shtohet ideve të tjera të shumta të sipërmarrësit për të monetizuar Twitter dhe për të reduktuar kostot. Por është dhe një mbajtje qëndrimi ndaj Apple.

Ata që abonohen nga iPhone ose iPad, ose përmes blerjeve brenda aplikacionit nga App Store, paguajnë më shumë, 11 dollarë në muaj kundrejt 8 të kërkuarve më parë. Qëllimi është padyshim që të anashkalohet dyqani online i Apple – i cili kërkon një përqindje prej 30% – për të stimuluar abonimin përmes ueb-it, ose direkt në Twitter. Në këtë rast, në fakt, paguhen 7 dollarë në muaj në vend të 4.99.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.