Ukraina shet rezervat e saj të arit – Deri tani janë shitur më shumë se 12.4 miliardë dollarë që nga fillimi i luftës

Banka qendrore e Ukrainës ka shitur 12.4 miliardë dollarë nga rezervat e saj të arit që nga fillimi i luftës me Rusinë në 24 shkurt. Sipas këtij institucioni shitja po bëhet në mënyrë që importuesit vendorë të jenë në gjendje të blejnë atë që i duhet popullsisë.

Nga ana tjetër banka qendrore e Ukrainës ka miratuar një rritje emergjente të normave të interesit në mënyrë që të frenojë inflacionin, por pa rezultat. Niveli i rritjes së cmimeve ka arritur deri në 21.5% në qershor.

Banka Qendrore ka pezulluar mbledhjet për politikën e normave të interesit pas fillimit të luftës me Rusinë në fund të muajit shkurt, por ka vepruar në mënyrë  radikale në mbledhjen e saj të parë, duke dyfishuar normat e interesit deri në 25% në datën 2 qershor.

Presioni i inflacionit është ekstrem në Ukrainë në një moment që qeveria lufton për të financuar luftën. Qeveria nuk ka më para dhe buxheti është nën presion.  Të ardhura fiskale kanë rënë me rreth 80% dhe eksportet ukrainase janë reduktuar deri në ¼ për shkak të bllokimit të porteve më të rëndësishme të vendit nga ana e Rusisë.

Për më tepër, tregu i brendshëm i obligacioneve është atrofizuar dhe Kievi është shkëputur nga tregu ndërkombëtar i kapitalit, ndërkohë që pasiguritë e luftës vazhdojnë.

Me shpenzime buxhetore prej rreth 9 miliardë dollarë në muaj, sipas Ministrisë së Financave, por me të ardhura të reduktuara në rreth 4 miliardë dollarë në muaj, qeveria iu drejtua Bankës Qendrore e cila tani financon drejtpërdrejt shpenzimet publike duke printuar kartmonedha. Donatorët ndërkombëtarë kanë premtuar mbështetje buxhetore prej rreth 16 miliardë dollarë, por shpërndarja e këtyre fondeve është bllokuar nga burokracitë. Që nga fillimi i luftës, donatorët perëndimorë kanë dërguar gjithsej 8.6 miliardë dollarë në mbështetje të shpenzimeve buxhetore të vendit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.