Ukrainë-Shqipëri/ “Linjat” e paprekura të tregtisë nga lufta – Që në maj nuk importohet me grurë e metal. Por ka produkte që s’janë cënuar!

Edhe pse është e përfshirë në luftë, Shqipëria nuk i ka shkëputur të gjitha marrëdhëniet tregtare me Ukrainën. Edhe pse në shifra modeste, Shqipëria po vijon të importojë mallra nga Ukraina.

Referuar të dhenave të tregtisë së jashtme të Instat, Shqipëria ka ndërprerë terësisht që prej muajit maj furnizimin me gizë dhe çelik si dhe me drithë nga Ukraina. Për këto mallra, Ukraina ka qenë një treg i rëndësishëm për Shqipërinë.

Megjithatë, ka edhe një serë produktesh të tjera që po vijojnë të blihen nga Ukraina në Shqipëri.

Importi i produkteve bulmetore, vezëve dhe mjaltit nuk është prekur nga lufta dhe ka vijuar rregullisht. Nga periudha janar deri në qershor të këtij viti, Shqipëria ka importuar nga këto mallra në vlerë nga 21 milionë deri në 29 milionë lekë në muaj.

Po ashtu, e paprekur ka mbetur edhe linja e vajrave dhe produkteve kafshore apo vegjetale ku Shqipëria çdo muaj ka importuar mesatarisht 115 deri në 224 milionë lekë.

Një tjetër linjë e paprekur është edhe ajo e pijeve, alkooleve dhe uthullave ku në 6 muajt e fundit ka importuar mesatarisht nga 43 mijë deri në 3.4 milionë lekë.

E paprekur ka mbetur linja e importit të drurit dhe qymyrit të drurit, ku mesatarisht çdo muaj janë importuar nga 966 mijë deri në 5.7 milionë lekë në muaj. E paprekur ka mbetur edhe linja e importit të veshjeve apo e importit të qelqit, ashtu sikurse ajo e makinerive e mobilerive.

Në total, Shqipëria ka importuar nga Ukraina në 6 muajt e fundit mallra me vlerë 2 miliardë lekë, duke njohur një rritje me 200 milionë lekë më shumë se në 6 mujorin e parë të vitit të kaluar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.