Vendet e G20, rregulla të reja për asetet e Crypto – Objektivi, Mbikqyrje më e mirë e tregjeve të kriptomonedhave

Vendet e G20-ës, po përpiqen të gjejnë një konsesus politik mbi asetet e kriptove për të informuar mbi rregulla më të qarta dhe të sakta globale.

India e cila aktualisht mban presidencën e G20-ës po mban takimin e parë të grupit të zv/ministrave të financave dhe krerëve të bankave qendrore. Implikimet e aseteve crypto për ekonominë, politikën monetare dhe sektorin bankar duhet të studiohen për të informuar këtë konsesus, u shprehën autoritetet indiane.

Sipas vendit organizator rregullorja duhet hartuar duke pasur për bazë këndvështrimin politik. Në fakt një nga prioritetet që janë vendosur në tryezë është ndihma ndaj vendeve për të krijuar një konsensus për qasjen e politikave ndaj aseteve crypto.

Diskutimet bëhen pas falimentimit të FTX, platformë për shkëmbimin e kriptomonedhave e cila ka nxjerrë në pah domosdoshmërinë për një mbikqyrje më të mirë të tregjeve të crypto-ve.

FTX, fondi i saj mbrojtës Alameda Research dhe dhjetëra filialë shpallën falimentimin në Shtetet e Bashkuara të Amerikës një muaj më parë, pasi platforma tregtare përjetoi tërheqje të nxituara.

Bisedimet në samitin e Indisë u përqendruan dhe në menaxhimin e dobësive të borxhit global, financimin e veprimit për klimën dhe qëllimet e zhvillimit të qëndrueshëm. Por dhe për forcimin e bankave shumëpalëshe të zhvillimit.

India, ekonomia e tretë më e madhe në botë dhe kombi i dytë më i populluar, mori presidencën e G20-ës për herë të parë në fillim të këtij muaji. Grupi përfshin 19 vende dhe Bashkimin Europian, ndërsa përfaqëson rreth 85% të PBB-së botërore.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.