Vendet e varfra, taksë globale për të pasurat? – Objektivi, financimi i humbjeve dhe dëmeve të shkaktuar nga ndryshimi i klimës

Vendet më të varfra në botë po përgatiten të përballen me ekonomitë më të pasura për sa i përket një kërkese për financim të menjëhershëm – mundësisht duke përfshirë taksa të reja mbi karburantet fosile ose fluturimet – për humbjet e pakthyeshme që po pësojnë nga kriza klimatike.

Fenomene meteorologjike ekstreme po godasin shumë vende në zhvillim dhe parashikohet të shkaktohen katastrofa të mëtejshme. Humbjet dhe dëmtimet janënjë nga problemet më të diskutuara në negociatat për klimën.

Disa nga vendet më të varfra në botë kanë përgatitur një dokument, i cili do të diskutohet këtë javë në Asamblenë e Përgjithshme të Kombeve të Bashkuara. Në këtë dokument thuhet se vendet e varfëra po kërkojnë një taksë globale të lidhur me klimën dhe të mbështetur në drejtësi, si një mënyrë për të financuar pagesat për humbjet dhe dëmet e pësuara nga bota në zhvillim.

Fondet mund të mblidhen nga një taksë globale e karbonit, një taksë mbi udhëtimet ajrore, një taksë për karburantet ndotëse – sidomos ato të përdorura nga anijet; si dhe duke shtuar taksa të tjera për nxjerrjen e karburanteve fosile ose një taksë mbi transaksionet financiare.

Dokumenti vë në dukje avantazhet dhe disavantazhet e secilës prej tyre, si dhe alternativat e mbledhjes së fondeve nga vendet e pasura nëpërmjet bankave botërore të zhvillimit. Si për shembull banka botërore, fondi monetar ndërkombëtar dhe sektori privat.

Të gjitha variantet për financimin e humbjeve dhe dëmtimeve, ka të ngjarë të jenë të vështira për t’u pranuar nga vendet e pasura. Kjo për shkak të rritjes së vazhdueshme të cmimeve të karburanteve fosile, ushqimeve dhe krizës aktuale të kostos së jetesës në të gjithë botën.

Dhe pse vendet e pasura ranë dakord në samitin e OKB-së për klimën se duhet të ketë një kornizë për humbet dhe dëmtimet, nuk ka ende asnjë marrëveshje se si do të mund të financohet ose kush do të kontribuojë.

Vendet do të takohen përsëri në bisedime të reja në Egjipt në muajin nëntor, ku kjo temë pritet të jetë prioritet. Mes trazirave gjeopolitike që nga pushtimi i Ukrainës nga Rusia, bisedimet e këtij viti ka të ngjarë të jenë më të ashpra.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.