Vendet që përdorin më shumë kriptomonedhat – SHBA renditet e para, ndiqet nga Ukraina dhe Britania e Madhe

Ka kaluar kohë që nga momenti kur kriptomonedha ishte thjesht një ide revolucionare, e largët për njerëzit që ëndërronin të arrinin ndryshime sociale përmes teknologjisë dhe ata që mund të nuhasnin një investim të mirë.

Ideja për kripto-n është kthyer në realitet, me Bitcoin – më e famshmja në tregun e kriptomonedhave në botë – që tani numëron mbi 180 milionë përdorues në mbarë botën dhe mbi 18 mijë biznese në të gjithë botën që aktualisht pranojnë pagesa me kriptomonedha.

Por kriptovaluta nuk është rritur në të njëjtën mënyrë në çdo vend. Një studim i ri nga Merchant Machine, një faqe interneti për krahasimin e përpunimin e pagesave, ka zbuluar se Shtetet e Bashkuara të Amerikës, Ukraina dhe Britania e Madhe janë 3 vendet kryesore për përdorim të kriptove në mbarë botën, bazuar në numrin e pronarëve të kriptove, bizneset që pranojnë kripto dhe sasinë e ATM-ve të Bitcoin në dispozicion.

Shtetet e Bashkuara të Amerikës ka numrin e dytë më të madh të pronarëve të kriptove në botë, mbi 27 milionë krahasuar me mbi 100 milionë të Indisë, por vendi ka përqindjen më të lartë të pronarëve të kriptove në krahasim me popullsinë e tij totale.

Numri i ATM-ve të Bitcoin në të gjithë SHBA-në gjithashtu eklipson atë të çdo vendi tjetër, me mbi 33 mijë makineta krahasuar me 2.458 të Kanadasë. India ka vetëm 2 ATM Bitcoin.

Arsyeja pse Ukraina është vendi i dytë pas SHBA-së për sa i përket përdorimit të kriptove është për shkak të luftës me Rusinë. Kievi ka mbledhur tashmë më shumë se 120 milionë euro në kripto që nga fillimi i pushtimit rus; shumë që ka ndihmuar në mbështetjen e trupave të tij dhe blerjen e furnizimeve ushtarake.

Por ekziston një ndryshim i madh midis zotërimit të kriptove dhe aftësisë për të lëvizur me kripto, duke paguar për mallra dhe shërbime me monedhë dixhitale. Në fakt, renditja e “Merchant Machine” e vendeve me numrin më të madh të bizneseve që pranojnë pagesa me kripto në vitin 2022 duket krejt ndryshe nga ato që renditin adoptimin e kriptove. Dallimi i dukshëm është numri i qyteteve europiane në listë, si për shembull Amsterdam, Vjenë, Madrid, Berlin, Paris dhe Athinë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.